Noiri
उत्प 13
अब्रामोअ आन लोटोअ आलाग ओवीइलाअ वर्णन
ताहां अब्राम तियाआ लाडी आन तियाआ आखी मालमिलकत लेत कोइत, लोटोहो बी आरी लेत कोइत, मिसर देसोहो सोड़ीत कोइत कनानोअ देहामा देसोअहें आयू. अब्राम मेडे-बोकड़े, वासड़ी-बोलोद, आन होना-पोशाआ वोडू कुन्बी ओतू. फाशुउ तो देहामा देसोअहें रोत सालित कोइत बेथेलोअ जागे तिहींज पोत्यु, जिहीं पेल तिये तियाआ पोड़ावू टाक्युतो, जो बेथेल आन एयोअ विसमेहें होय. वेगो तिये देवान्यो बांद्योतो तियी जागे तो आयू; आन तिहीं अब्रामे फाशीइ यहोवाहा आराधना कोअयी.
लोटोपोअ बी, जो अब्रामोअरी सालतुतो, मेडे, डोगरेन बोकड़े आन तोंबा ओता. तियाहा काजे तिया देसोम तियी होमसे ते एठ्ठाज रोत सेके एतुहू तो जागू पुरतू ने ओतू: काहाके तियांपोअ जाअखीलीही मालमिलकोत ओती, तियाहा काजे ते एठ्ठाज ने रोत सेका. अब्रामोअ आन लोटोअ मेडे-बोकड़े, आन वासड़ीन-बोलदोअ डोरक्याआं विसमेहें भान्गड़ ओवी. तियी होमसे कनानी आन परिज्जी माअहें तिया देसोम रोतेते.
ताहरुउ अब्राम लोटोहो कोनु वोल्यू, “माआन ताआ विसमेहें, आन माआन ताआ सारवाल्योअ विसमेहें भान्गड़्यी ने ओवुहूं जोवे; काहाके आपू पाही-पाहीज होय. केहें पुरो देस ताआ सामने नाहां के? तियाहा काजे तु माप रोत नारु ओत जा; जर तु हाजाड़्यी वोग जाही, ताहां आंय बांगाड़्यी वोग जाहीं.”
ताहां लोटे नजर टाकीत कोइत यारदेन नोयीइ आहने वाला बाहरी निला-निलाज खासड़ोहो देख्यू. तेहलाम यहोवा देवे सदोम आन गोमोराहा ने आरव्योतो, ताअहूं जाआं सोअरोअ वाटेएहीं जाआं तो खासड़ यहोवाआ बोगिसो, आन मिसर देसोअ होस पाक आपनारु जागू ओतू.1 तियाहा काजे लोट तियाआ कोअते यारदेनोअ पुरा खासड़ोहो निवड़ीत कोइत उक्तामाअहें गोयु, आन ते बेनू जोओं आलाग ओत गोया. अब्राम कनान देसोमेहें रोयू, पोन लोट तिया खासाड़ोअ होयरोम रोनु वोल्यू; आन तियाआ तोंबु सदोमोअ आहने उबू कोअयू. सदोमोमेर्येए माअहें यहोवाआ नजरेम जास् खाराब आन पापी ओते.
अब्रामोअ हेब्रोनोम जाअलोअ
जाहां लोट अब्रामोप रोत आलाग ओत गोयू ताहरुउ तिहींइं फासाड़ी यहोवा देवे अब्रामोहो कोयो, “जिया जागाम तू होय तिहीं रोत पालामा-देहामा, उक्तामा-बुट्टामाआं शारी वोल नजर टाक. काहाके जेतू जागु ताहूं देखाअहे, तो आखू जागू आंय ताहूं आन ताआ पारवाड़ीही हादाजोलम्युउ काजे आपी देहीं.2 आन आंय ताआ पिड़ीही धरतीइ तुलाआ होस जाअखीलीही कोअहीं, एतीही जाआं कोअहीं के जो कोडो धरतीइ तुलो गोणीत सेके तो ताआ पिड़ी बी गोणीत सेके. उठ, जा, या देसोम फिरीत आव, काहाके आखु मुलोख आंय ताहूं आपोहो.” ताहरुउ अब्राम तियाआ तोंबु उफड़ीत कोइत हेब्रोनोअ आहने मम्रेए सोका साड़ोअ जागेहे आवित कोइत रोनु वोल्यू; आन तिहीं बी यहोवा देवोअ कोअते एक देवान्यो बोणायो.
Source notes (2)
- Cross-reference उत्प 2:10
- Cross-reference प्रेशित 7:5
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.