Noiri
यहे 6
देव मुर्ती पुंजनोअ दोश लागाड़त्लू
फाशोअ यहोवाआ ओं वसन माआ जागे पोत्यो: “ए माहुंउं पोर्या, ताआ सोब इस्राएलोअ डोगोअ वोल कोइत तियांआं विरुद्द भविश्यवाणी कोअ. एहें कोइत को: ए इस्राएलोअ डोगोओ, तुमू प्रभु यहोवाआ वसन उनाआ! प्रभु यहोवा डोगोहो आन टेंबाहा, काटोहो आन बाऱ्यीही एहें कोहे: पाला, आंय तुमापोअ तारवाआ सालाड़ीहीं, आन तुमाआ पुंजन कोइलोअ उसा जागाहा आरवीत देहीं. तुमाआ देवान्यो उजड़ीत जाय आन तुमाआ दिहोअ मुर्तीइ पुकरान पुकरा ओत जाय; आन आंय तुमामेर्याअ मोअल्या माअहोंहों तुमाआ मुर्तीइ आगाड़ी उडाड़ी देहीं. आंय इस्राएलवालाआ तोड़ोहों तियांआं मुर्तीइ आगाड़ी मिकीहीं, आन तुमाआ आड्के तुमाआ देवान्याआ आसेपासे वेरी देहीं. तुमाआ जेतेहे होयरे होय, तें आखे उजड़ीत जाय, तुमाआ पुंजन कोइलाआ वोडा जागा बी उजड़ीत जाय, तुमाआ देवान्यो उजड़ीत जाय आन तुमाआ मुर्ती टुटीत जाय, तुमाआ आगीइ देवान्यो डुन्का ओत जाय, आन तुमाआ आखी कारागिरी आरवात जाय. तुमाआ विसमेहें खुने पोड़े ताहां तुमू जाईंत लेहा के आंय यहोवा होय.
“तेबी आंय तुमामेऱ्याआ थोड़हांहां वासाड़ीत मेकिहीं. याअकाजे के जेहेलाम तुमू देसो-देसोमेहें वेरासेर ओत जाहा, ताहां राज्या राज्याआ विसमेहें तुमाआ थोड़ेक माअहें तारवाइ रोत वासाइत जाय. तें वासाअले माअहें, तियी जातीइ विसमेहें, गुलाम बोणीत जाय, माहूं ओर कोए: आन ओं बी कोय के आमांआं सिनालो कोअनारो मोन केहें कोइत यहोवा रोत सेटे ओत गोयो, आन सिनालो कोअनारा आमाआ डोआ मुर्तीपोअ केहें कोइत लागाहा, जियावाअहीं यहोवाआ मोन टुटोहो. एहें कोइत तियी खाराब गोठी वाअहीं जे तियां तियांआं खाराब कामे कोइत कोअयीही, ते तियांआं नजरेमेहें सोगदाय ठोरे. ताहां ते जाईंत लेय के आंय यहोवा होय, आंय तियांआं आखो नुकसान कोइलोअ जों कोयोहो तों वायबार नाहां कोयो.”
प्रभु यहोवा एहें कोहे: “आथेन गुडा वेंदड़ीत को, इस्राएलोअ घराणाआ आखा बाक्ता कामोअ कि ओवे! काहाके तें तारवाआ, फुक, आन मोरायी वाअहीं आरवात जाय. जों सेटे ओय तों मोरायी वाअहीं मोए, आन जों जागे ओय तों तारवाइ वाअहीं मोए; आन जों वासाइत कोइत गांवोंमेहें रोत जाय, तों फुके वाअहीं मोए. एहें कोइत आंय माआ खोत तियांपोअ पुरी कोअहीं. जेहेलाम हारेक उसा डोगोअ आन डोगोअ हारेक सुटीपोअ आन आखा निला साड़ोअ निसे, आन आखा निला वांज्या साड़ोअ सावलामेहें, जिहीं जिहीं तें तियांआं आखी मुर्तीही हाजी हुतेहे मेकीत हाजो गोंदाण्यो तेल सोड़वीइतेहे, तिहीं तियांआं माआले माअहें तियांआं देवान्याआ आसेपासे तियांआं मुर्तीइ विसमेहें पोड़ीत रोय; ताहां तुमू जाईंत लेहा के आंय यहोवा होय. आंय माआ आथ तियांआं विरुद्दाम नांबू कोइत तिया देसोहो आखा गांवोंहों जंगलोअहीं रोत्ते रिबला जाआं उजाड़ी देहीं, ताहां तें जाईंत लेय के आंय यहोवा होय.”
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.