Skip to content
BibleKenya

Noiri

यहे 43

मंदिरोम देव वापिस आवे

तिहींइं फासाड़ी तो माहूं दिही उगताआ वोल्याआ बाअणाआ जागे लेत गोयू. ताहां इस्राएलोअ देवोअ महिमाआ उजालो उगतामाआ वोल रोत आयो; आन तियाआ आवाज जाअखीला पाअयोंअ होस बिवाड़े एहलुहू ओतू.1 ओ दर्शन तिया दर्शनोअ होसऱ्योअ ओतो, जों आंय तियाहा होयरोहो आरवीइलाअ कोअते आवत्लो देख्योतो; आन तिया दर्शनोअ होस, जो आंय कबार खाडीइ मेरेपोअ देख्योतो; आन आंय उबडू पोड़ीत वोंद्यो. ताहां देवोअ महिमा उगतामाआ वोल रोत मंदिरोम आयी.

ताहां आत्मा माहूं विसीत कोइत मायतेए खोलीम पोताड़्यू. देवोअ महिमा मंदिरोम पोआत गोयी. जेहेलाम तो माटी माआ जागे उबु ओतू तेहेलाम आंय कोडाहा तेबी माअरी गोठी मिकत्लाहा देख्यू. यहोवा माहूं कोयो, “मोनवीइ पोऱ्या, ओ जागू ताम माआ राजगादी आन माआ गुडा मिकीइलोअ जागू होय. जिहीं आंय इस्राएल माहुंउं जागे वोहती कोइत रोहीं. ओमे इस्राएलोअ कुटुंबो माआ सोका नावोहो एठो ने कोए: ने तें माहें के ने तियांआं राजा बिहीरा देवोअ फाट लागीत माहूं दोकू देय, आन तियांआं मोल्या राजाआं तोड़ो वाअहीं माआ सोका नावोहो एठो ने कोए. तें माआ खोलीइ ओटाअरी तियांआं ओटू आन माआ बाअणाअहीं खांबाअरी तियांआं खांबू बोणावतेते. माआ आन तुमाआं विसमेहें निस्तो एकुज पितड़ो ओतो, तियां सोताआ खाराब कामोवाअहीं माआ सोका नावोहो बिगाड़्योतो; तियाहा कोत माहूं खोत लागी आन आंय तियांहां आरवीत टाक्ये. ताहरेए ओमे तें तियांआं सिनालो आन तियांआं राजाआं तोड़ोहो मारोत सेटे कोई देअहूं जोवे, ताहां आंय तियांआं विसमेहें रोहीं.

“आन ए मोनवीइ पोऱ्या, या इस्राएलोअ कुटुंबाहा तियांआं खाराब कामोअ उस्ती तु या मंदिरोहो मापे तेहें काजे याआ नमुनू देखाड़, ताहां तियांहां लाज आवे. जर तियांहां तियांआं खाराब कामोअ लाज आवे, ताहां तियांहां या मंदिरोअ आकार आन बोणावट आन याआ बारथे आन मायवाली आव-जाव कोइलोअ वाट आन तियाआ आकार, कायदू, नियम तियांआं सामने लेखीत देखाड़; ताहां तें याआ आकार आन याआ आखा नियम मुंदू पाड़ीत तियाआ पुरमाणेज पालन कोअहूं जोवे. मंदिरोअ नियम एहलुहू होय के डोगोअ सुटीपोऱ्युउ आखु भाग सोकू होय.”

देवान्याआं बोणावट

देवान्याआं माप एहें कोइत होय, इंहीं एक आथ ताहां एक आथ आन शार आंगली; तियाआ थुड़तेए भाग एक आथ उसू आन एक आथ पोलू आन कोरेए भाग एक बिलास पोइत ओतू. देवान्याआं उंसी एहें कोइत रोअहूं जोवे: पुयींहीं लागाड़ीत ते निसेए बुंद्याअहीं जाआं एक आथ नांबो रोअहूं जोवे; आन सोवड़ाय विही इंसी जोवे, पुयींहीं लागाड़ीत ते उसेए कांगोलोअ जागे जाआं शार आथोअ माप जोवे. देवान्याआं सिगापोऱ्युउ भाग शार आथ उसू जोवे, तिहींपोऱ्याआ पेटाड़ीइलोअ जागापोअ शारी खुणे शार सिगा निहींत रोअहूं जोवे. देवान्याआं जागऱ्युउ जागू विही फुट नांबू आन बारा आथ पोलू जोवे, ताहां तो जागू बोराबर सोवकड़्यू बोणे. विसगाल्यू जागू बी सोवकड़्युज जोवे, तो शोवदा आथ नांबू आन शोवदा आथ पोलू जोवे, आन तियाआ कोर आरदा आथोअ जोवे. तियाआ बुंद्यो शारी सोमकीर एका आथोअ जोवे. तियाआ पायतरी उगतामाआ वोल ओती.

देवान्याआं अर्पण

फाशोअ देवे माहूं कोयो, “मोनवीइ पोऱ्या, आंय जों कोहो तों कान दे, जेदिहीं गाराहा आपीइलोअ काजे देवान्यो बोणावे तिया दिहोअ नियम एज रोअहूं जोवे. सादोकोअ पोऱ्या ए लेवी पुंजारा होय, आन ए माआ सेवा कोइलोअ काजे माआ जागे रोताहा, तियांहां तु पापोअ काजे गाराहा आपे तेहें काजे एक वासड़ो आपजी, एहें कोत यहोवा देव कोहे. तु गाराहा आपिही तिहींमेऱ्योअ थोड़ोक रक्त देवान्याआं शारु सिगापोअ हारुहूं जोवे. एहें कोइत तु देवान्याहा सोकालजी. ताहां पापोअ काजे वासड़ो लेत कोइत मंदिरोअ बारथे ठरिवल्या जागाम पेटाड़ी देजी. बिहीरे दिही तु निर्दुस बोकड़ू पापोअ गाराहा कोत सोढ़वीइजी; जेहें कोइत वासड़ा वाअहीं देवान्यो सोकाल्यो तेहें कोइत या बोकड़ा वाअहीं तों सोको ओवे. जेहलाम तियाहा तु सोको कोइत सुकीही तेहेलाम एक निर्दुस वासड़ो आन एक निर्दुस मेडो गाराहा कोअजी. तु ओं गाराहा देवोअ सामने कोअजी. पुंजारु तियापोअ खारो टाकीत तियांहां गाराहा कोत पेटाड़ी देय. तु हांत दिही जाआं दाड़ीइज पापोअ काजे एक बोकड़ू, एक वासड़ो, आन एक निर्दुस मेडो तियार मिकजी. हांत दिही पुंजारु देवान्याहा सोकाले, तिहीं रोत देवान्यो सोको ओत जाय. एहें कोइत देवान्यो तियार कोइत हांत दिही ओत जाय, तिहींइं फासाड़ी आंठवा दिहोअरी पुंजारा पापोअ गाराहा आन शांतीइ गाराहा कोइत सेके, आन तुमाआ स्विकार कोअहीं एहें कोत यहोवा देव कोहे.”

Source notes (1)
  1. Cross-reference यहे 10:3,4,18,19; 11:22-23; प्रगटी 1:15

Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.