Noiri
निर्ग 23
न्याय आन निती
“तु ठोगोअ गोठीइ मा परसार कोअही. पापी माअहोंअ वोल साक्शी मा देही. तु सुकी कोअनारा वोडा टोलाअरी सामिल मा ओवही; आन तु वोडा टोलाआ मोर्जीइ परमाणे गुनामेहें न्याय बिगाड़ीलोअ काजे साक्शी मा देही; आन गरीबोअ न्याय होय कोत तियाआ भेदभाव मा कोअही.”
“जर ताआ दुस्मोनोअ बोलोद नेत गोदड़ो टाकाअलो ताहूं जोड़्यो, ताहां तियाहा तियाआ मालख्योअ जागे पोताड़ी देजी. जर तु ताआ दुस्मोनोअ गोदड़ाहा वोजा वाअहीं दाबाइत रोल्यो देखही, ताहां तियापोर्यीइ खोत विहीराइत तियाआ गोदड़ाहा वोजू उठाड़ीइलोअ मदत कोअजी.”1
“तुमामेहें जो गरीब ओय तियाआ न्याय मा बिगाड़ही.2 तु ठोगोअ आरोप मा लागाड़ही, आन निर्दुस आन न्यायी माहोंअ खुन मा कोअही, काहाके आंय पापीही निर्दुस ने सोड़ो. लास मा लेहा, काहाके लास माहुंहूं सत्य गोठी रोत आंद्लो कोइ देहे आन निर्दुसोअ न्याय बिगड़ीत जाहे.”
“तु पारका माहूंपोअ दाबाव मा टाकही. काहाके तुमुहूं मुंदू होय के तुमू बी मिसर देसोम पारके ओते.”3
हांतवो वोरिही आन हांतवू दिही
“तु सोव वोरह्ये जाआं सोताआ खेतोमेहें बियारु ओअजी आन ओन पाक टोलु वालजी;4 पोन हांतवे साल मा खेड़ही, तिहींमेएं जों ओन उगे आन पाके ताहां कीज बी मा वाडही, पोन गोरब्योअ काजे रोअहूं देजी. जों बाकी रोत जाय तों रानठ्या जनवारोंअ काजे रोअहूं देजी. तेहेंज कोइत ताआ दाराक्शाआ मोलू आन जेयतुनोअ वाडीइ बी तेहेंज कोअजी.”5
“तु सोव दिही जाआं मेहेंनत कोअजी, पोन हांतवे दिही आराम कोअजी; काहाके ताआ बोलोद आन गोदड़ाहा आराम जोड़े ताआ पावरोअ पोर्ये आन बिहीरा देसोअ पारको माहुंउं बी आराम कोइत सेके.6
“जों किबी आंय तुमुहूं कोयोहो तों कान देत उनाअजा; आन बिहीरा देवोअ माग बी मा काडहा, आन तियांआं नाव तुमाआ सोबीपोअ जाआं मा लेहा.”
तिन वोडा तिवार
(निर्ग 34:18-26; कायदा 16:1-17)
“वोरह्योअ डिठ तिनवारी माआ काजे तिवार कोअजा. खमीरोअ रोटाआ तिवार कोअजा; तियाम माआ नियमोअ पुरमाणे आबीब मोयनाआ नियमोअ होमसे हांत दिही जाआं खमीरोअ रोटू खाया कोअजा, काहाके तियाज मोयनामेहें तुमू मिसरोमेहें रोत निहींत आयेते. कोडोज बी ठाल्ले आथे माआं सामने ने आवुहूं जोवे.”7
“जर ताआ ओअल्या खेतोमेएं पेलठो फोलवो ओन पाकीज जाय, ताहां वाडीइलोअ तिवार कोअजा.
“वोरहोअ सेवटी जेहेलाम तु मेहेंनतोअ फोलवे टोलू वालित टिग कोअहा, ताहां टोलू वालीइलोअ तिवार कोअजा.8 वोरह्योअ डिठ तिनू वारी तुमू आखा माटी प्रभु यहोवा देवोअ सामने हजर ओवजा.”
“गाराहा कोअल्यो रक्त खमीरोअ रोटाअरी माआ जागे मा लेत आवहा, आन माआ तिवारोअ हाजो गाराहामेहें9 रोत थोड़ोक बी वेगीइ जाआं रोअहूं मा देहा.
“तुमाआ कामायीइ पेलठो फोलवो तुमाआ यहोवा देवोअ कोअमेहें लेतावा. मेडाआ नेताहां बोकड़ीइ बासाहा तियाआ आयहीइ दुदोम मा रांदहा.”10
हुकूम आन खबर
“उनाआ, आंय एक देवदूत ताआ आगाड़ी आगाड़ी मोकलोहो जो वाटेमेहें ताआ राखवाली कोए, आन जिया जागाहा आंय तियार कोअयुहू तियामेहें ताहूं पोताड़ीहीं. तियाआ सामने सांबालीत रोजी, आन तियाआ मानजी, तियाआ विरोद मा कोअही, काहाके तो ताआ गुनाहां माफ ने कोए; याअकाजे के तियामेहें माआ नाव रोहे. जर तु खोराखर तियाआ मानिहीं आन जो किबी आंय कोहीं तो कोअही, ताहां आंय ताआ दुस्मोनोअ दुस्मोन आन विरोद कोअनाराआ विरोद कोअहीं. एहेंकोइत माआ देवदूत ताआ आगाड़ी आगाड़ी सालीत कोइत ताहूं एमोरी, हित्ती, परिज्जी, कनानी, हिव्वी, आन यबूसी माअहोंअ जागे पोताड़े, आन आंय तियांहां आरवीत टाकीहीं. तियांआं देवताआ पागे मा पोड़हा, आन तियांआं सेवा मा कोअहा, पोन तियांआं मुर्तीही फोड़ीत टाकजा, आन तियांआं देवोअ पाल्याहा फोड़ीत कोइत पुकरान पुकरा कोइत टाकजा. तु ताआ देवोअ यहोवाअ भक्ती कोअजी, ताहां तो ताआ रोटा पाअयोंपोअ आशिर्वाद आपे, आन ताआ विसमेहें रोत बिमारी सेटे कोए. ताआ देसोम कोड्लीज बोईंइ पोर्यो ने पोड़े आन ने वांज्यी रोय; आन ताआ वय आंय पुरी कोअहीं.”
“आन जेताहा माअहोंअ विसमेहें तु जाही तियां आखाअ मोनोमेहें आंय माआं बिक पेलरोतुज एहे कोइत पोई देहीं के ते पोंगलात जाये, आन ते आखे बित कोइत गुगदे वोले. आन आंय ताआ रोत पेल डांग्ये मोकलिहीं जें हिव्वी, कनानी, आन हित्ती माअहोंहों ताआ सामने रोत ओड़ीत काडे. आंय तियांहां ताआ सामने रोत एकाज वोरह्योमेहें ने काडो, एहेलोह ने ओवुहूं जोवे देस उजड़ीत जाय, आन रानठ्ये जनवारे वादीत कोइत ताहूं तारास देने वोले. जाअहूं जाआं तु ताआ गणती वादाड़ीत कोइत देसोहो ताआ सोताआ आधिकारोम ने कोइत लेहीं ताअहूं जाआं आंय तियांहां ताआ सामने रोत थोड़थोड़े कोइत काडतू रोहीं. आंय लाल दोर्याअहीं रोत पलिश्तीइ दोर्याआ जागे जाआं आन जंगलोअहीं रोत फरात नोयीइ जागर्युउ आखु मुलख ताआ ताबाम कोइ देहीं; आंय तिया देसोम रोनाराहा बी ताआ ताबाम कोइ देहीं, आन तु तियांहां ताआ सामने रोत आखाहा काडी देही. तु तियांअरी आन तियांआं देवताअरी शप्पत मा खाही. ते ताआ देसोम रोअहूं ने जोवे, जर रोये, ताहां तें ताहूं माआ विरुद्दाम पाप कोआड़े; आन जर तु तियांआं देवताआ भक्ती कोअही, ताहां ओं ताआ काजे फांदू बोणे.”
Source notes (10)
- Cross-reference कायदा 22:1-4
- Cross-reference कायदा 16:19
- Cross-reference निर्ग 22:9; लेवी 19:33,34
- Cross-reference लेवी 25:11
- Cross-reference लेवी 25:1-7
- Cross-reference लेवी 23:3; कायदा 5:13-14
- Cross-reference लेवी 23:6-8; गणती 28:17-25
- Cross-reference लेवी 23:15-21; 23:39-43; गणती 28:26-31
- Footnote गाराहामेहें थोड़ाक लेख्यामेहें सरबी लेख्यो जोड़ेहे.
- Cross-reference कायदा 26:2; 14:21; निर्ग 34:26
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.