निर्ग 10

आंठवी पिड़ा:

टिड्ड्ये

1तिहीं रोत यहोवा देवे मोशेहे कोयो, “फारोअ जागे जा; काहाके मीज तियाआ आन तियाआ कर्मसाऱ्योंअ मोन कड़क कोई देदोहो, मोन्ज्ये आंय माआं समत्कार तियांआं विसमेहें देखाड़ीत सेको; 2आन तुमू तुमाआ पोऱ्याहां आन पोऱ्याआ पोऱ्याहां कोत देखाड़ीत सेकहा, के यहोवा देवे मिसर देसोवालाहां केहेलेहे फोगे बोणावये, आन माआ केहेला केहेला समत्कार तियांआं विसमेहें कोइत देखाड़्या; जियावाअहीं तुमू जाईंत लेहा के आंय यहोवा होय.”1

3ताहां मोशे आन आरोन फारोअ जागे जात कोइत कोयो, “इब्रीवालाआ देव यहोवा एहेंकोइत कोहे: तुमू केदिहीं जाआं माआ ने उनाअनारे? माआ माअहुंहूं जाअहूं द्या के ते माआ भक्ती कोए. 4जर तु माआ माहुंहूं जाअहूं ने देही ताहां उनाआ, हांदाआ आंय ताआ देसो मेहें टिड्ये लेत आविहीं, 5आन ते धरतीही एहेंकोइत टापित लेय के ते देखाइत ने पोड़े; आन तुमाआ जो किबी बोर्फा वाअहीं वासाइत रोयोहो तियाहा आरवीत देय, आन तुमाआ जेतेहे बी साड़े खेतोमेहें लागाड़्येहे तियांहां बी तें आरवीत देय, 6आन तें ताआ आन ताआ आखा आधिकाऱ्योंहों, इंहीं जाआं के आखा मिसरोअ कोअमेहें पोआइत जाय; एतेहे टिड्ड्ये ताआ डायहां नेत वेगाआ डायहां जोयोंअ रोत धरती पोअ उबज्या तोयोंअ रोत आज जाआं केदिहीं ने देख्यो.” ताहां तो फिरीत कोइत फारोअ जागे रोत जातु रोयू.

7ताहां फारोअ आधिकारी तियाहा कोना वोल्या, “तें माअहें केदिहीं जाआं आमाआं काजे फांदू बोणीत रोय? तियां माअहुंहूं जाअहूं दे के तें तियांआं देव यहोवाआ भक्ती कोए. केहें तु ओमे जाआं नाहां जांअतू के आखो मिसर आरवाअहे?”

8ताहां मोशे आन आरोनोहो फारोअ जागे फाशोअ हाद्यो, आन तिये तियांहां कोयो “जावा, तुमाआ देव यहोवाअ भक्ती कोआ; पोन जे जानारे होय ते कोडे कोडे होय?”

9मोशे कोयो, “आमुं ते पोऱ्या-पोर्‍यी, मेडे, डोगरेन बोकड़े आरी आन पोर्‍याअहीं रोत ते डायाअहीं जाआं आखे बादे जानारे, काहाके आमुहूं यहोवाअ काजे तिवार कोइलोअ होय.”

10एहेंकोइत फारो राजा तियांहां कोयो, “यहोवा तुमाआरी रोये जर आंय तुमुहूं पोर्‍याअरीज जाअहूं देहीं ताहां; पाला, तुमाआ मोनोमेहें खाराबी होय. 11नाहां, एहलोहो ने ओवे; निस्ता तुमू माटी एताज जात कोइत यहोवाआ भक्ती कोअजा, तुमुहूं ओंज ते जोवतोतो.” आन मोशे आन आरोन फारोअ आगाड़ी रोत निहींत गोया.

12ताहां यहोवा मोशेहे कोयो, “मिसर देसोअ वोल ताआ आथ आगाड़ी कोअ के टिड्याआ टोलु मिसर देसोम सोड़ीत कोइत धरती पोअ जेतोहो बी ओन होय आन गारा वाअहीं वासाइत रोयोहो तिया आखाहा खात जाय.” 13तियाहा कोत मोशे तियाआ आथोमेऱ्यीइ डेंगार लेत मिसर देसोपोअ उमाअयू, ताहां यहोवा देवे दिही पोइत आन रात पोइत वारो सालाड़्यो, आन जेहेलाम हुज्यो तेहेलाम तियाआ वाराअरी टिड्ये आये. 14आन ते टिड्ये मिसर देसोमेहें आखे रानेज पसरीत गोये, तियांआं टोलू एतुहू वोडू ओतू के एतुहू वोडू टोलू मिसर देसोमेहें नाहां केदिहीं आयू आन फासाड़ी ने केदिहीं आवे.2 15तिये टोले आखी धरतीही टापित लेदी, तेतोज नाहां पोन तियांआं उसे उडीइला वाअहीं पुरा मिसर देसोम आंदारो सेवात गोयो; आन गाराआ तोड़ाका वाअहीं जों किबी वासाअयो ओय, तों आखो टिड्या खात नावासट नुसी देदो; आन मिसर देसोमेहें कोड्लाज साड़ोअ नेत साटवाआ निलो पान बी ने रोयो आन खेतोमेहें किज कामाय ने रोयी.

16तेहेलाम फारो राजे मोशेहे आन आरोनोहों ताबुड़तुड़ हादाड़्या आन कोयो, “आंय तोम तुमाआ देव यहोवाअ विरुद्दाम आन तुमाआं विरुद्दाम पाप कोअयुहू. 17तियाह काजे ओमेएं फेरे तेबी माआ पाप माफ कोइ द्या आन तुमाआ देवोहो प्रार्थना कोआ के तो माआ पोअ रोत ए मोतोअ पिड़ा सेटे कोइ देय.” 18ताहां मोशे फारो राजा सामने रोत निहींत जातु रोयू आन देवोहो प्रार्थना कोअयी. 19ताहां यहोवा देवे दिही बुडताअहें वारो वोहाड़्यो आन तो वारो आखा टिड्याहां वोहाड़ीत लाल दोर्‍यामेहें टाकी देदे, ताहां मिसर देसोमेहें एक बी टिड्यो नाहां रोयो. 20पोन तेबी यहोवा देवे फारो राजाअ मोन फासोअ कठीण कोई देदो आन तिये इस्राएलवालाहा ने जाअहूं देदे.

नोववी पिड़ा:

आंदारो

21ताहां यहोवा मोशेहे कोयो, “ताआ आथ जुगोअहें उसु कोअ के मिसर देसोपोअ आंदारो टापाइत जाय, एहलोहो आंदारो के आथो वाअहीं जाआं सापलाय.” 22ताहां मोशे तियाआ आथ जुगोअहें उसू कोअयू, आन पुरा मिसर देसोमेहें तिन दिही जाआं जाडो आंदारो टापाइत रोयो.3 23तिन दिही जाआं कोडाहा कोडे ने देख्यो आन कोडोज जागापोअ रोत ने आल्यो; पोन पुरा इस्राएलवालाआ कोअमेहें उजालो ओतो.

24ताहां फारो राजे मोशेहे हादाड़ीत कोइत कोयो, “तुमू जावा, तुमाआं देवोअ यहोवाआ भक्ती कोआ; तुमाआ पोऱ्याहां बी आरी लेतेज जावा; पोन तुमाआं मेडे, डोगरेन बोकड़े इहींज मिकीत जावा.”

25मोशे कोयो, “आमाआं एतेज नाहां पोन ताहूं बी गाराहा आन भेट कोइलाआ बोकड़े-वासड़े आपीइले आवनारे, तियांहां आमू आमाआं देवोह गाराहा आपित सेको. 26या कोअते आमाआ पाल्ल्ये जनवारे बी आमाअरी आवे, तियांआं एक खुर्‍यो बी ने रोय, काहाके तियाजमेहें रोत आमुहूं आमाआ देव यहोवाहा भक्तीइ सामान लेअलो आवे, आन आमू जाअहूं जाआं तिहीं नाहां पोते ताअहूं जाआं नाहां जाअते के कि कि लेत कोइत यहोवाअ भक्ती कोइला ओय.”

27पोन यहोवा देवे फारो राजाअ मोन कठीण कोइ देदो, तिहीं वाअहीं तिये तियांहां जाअहूंन्ने देदे. 28ताहां फारो राजे मोशेहे कोयो, “माआ सामने रोत निहींत जा! ओमे रोत ताआ सोब माहूं फाशुउ मा देखाड़ही, जेदिहीं ताआ सोब माहूं देखाड़ही तेदिहींज तु मोअही.”

29मोशे कोयो, “तुमे ए गोठ बोराबर कोयो; आंय ताआ सोब ओमे रोत केदिहींन्ने पालो.”