Noiri
दानि 12
आखरीइ वेल
“तियी वेले मिखाएल नावोअ वोडू मुख्यू, जो ताआ माअहुंउं वोल उबू रोहे, तो उबू रोय. ताहां एहेलिही ओड़सनीइ वेल रोय, जेहेलोहो यी धरतीपोअ राज्ये बोण्ये तोयोंअ रोत ओमे जाआं केदिहीं नाहां ओवो, आन ने ओवे; तेहेलाम ताआ माअहूंम रोत जेताहा जोंओंअ नावे देवोअ पुस्तकोमेहें लेखाअयेहे, तें वासात जाय. जें धरतीइ निसे माहणोमेहें हुवित रोयेहे तियांमेर्येए वारुज माअहें जागीत उठे, वार जोएं ते हादाफल्याआ जिवनोअ कोअते उठे, आन वार जोएं ते तियांआं खाराब नावोवाअहीं आन हादाफल्याआ अपमानोअ काजे उठे. ताहां समजदार माअहें जुगोअ उजालाआ होस रोय, आन जें वार जोओंहों धर्मी बोणावतेहे, तें हादाफल ताराआ होस उजालावाले रोये.”
“पोन ए दानियेल, तु या पुस्तकोपोअ सिक्कू लागाड़ीत यां वसनोहों दुन्याआं सेवट जाआं गुप्त्यी मिक.1 जाअखीलेहे माअहें होदफुस कोए, आन यावाअहीं ज्ञान बी वादीत जाय.”
“ओं आखो उनाइत, आंय दानियेल उसे नजर कोइत कि पाल्यो के बेन माटी उबा होय, एक कांय नोयीइ यी मेरे उबु होय, आन बिहीरु नोयीइ तियी मेरे उबू होय. ताहां जो माटी पेंडीइ हुतोअ आंगड़े पोवित खाडीइ पाअयोंपोअ ओतू, तियाहा तियांमेर्येए एके माट्ये फुशो, ‘यां बोगलाड़नारा कामोअ सेवट कोयों ओवे?’”
“ताहां जो माटी पेंडीइ हुतोअ आंगड़े पोवीत नोयीइ पाअयोंपोअ ओतु, तिये आंय उनाअत्लू तेहेंज तियाआ हाजाड़्यू आन बांगाड़्यू बेनू आथ होरगाआ वोल उसा कोइत, हादाजलम जिवता रोनारा देवोअ शप्पत खात कोइत कोयो, ‘ए दशा साड़े तिन वोरह्ये जाआं एतीज रोय; आन जेहेलाम सोका माअहोंअ सेक्ती कमी कमी ओत सेलात जाय, ताहां ए आखी गोठी पुरी ओवे.’”
“आंय ए गोठी उनाअतुतो खोरु पोन माहूं किज ने समजाअयो. ताहां आंय कोयो: माआं प्रभु, यीं आखी गोठीइ सेवट्योअ फल कि रोय?”
तिये कोयो, “ए दानियेल, तु जातु रो; काहाके ए आखी गोठी आखरीइ दिहोअ काजे गुप्त्यी मिक्यीही, आन यींपोअ सिक्कू लागाड़्युहू. वारुज माअहें ते सोताहा सोके आन साफसुफ ओत जाय; पोन पापी माअहें खाराब कामे कोअते रोय; आन तियां पाप्योमेऱ्याआ कोडाहाज ए गोठी ने समजाय; पोन जें समजदार होय तियांहांज समजाय.”
“जोयोंअ रोत होमबली कोइलाआ बोंद ओवे, आन एठी वस्तुहू तिहीं थापन कोए, तोयोंअ रोत बारा होव नोव्वोद दिही सेकीत जाय. जें हिम्मत तोइत कोइत एक हाजार तिन होव पोस्तिस दिही पुरा कोए, तियांआं जाअखो हाजो आवे.”
“पोन दानियेल, ओमे तु जात कोइत ताआ जिवीइलोअ दोरी ओय ताअहूं जाआं जिवही तिहीं रोत वोडी निंदेम जातु रोही; आन सेवटीपोअ वोडी निंदेम रोत उठही तेहेलाम ताहूं ताआ ठरवीइल्यू वाटू जोड़े.”
Source notes (1)
- Cross-reference प्रगटी 22:11
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.