Noiri
1 योहान 5
विश्वासोवाईं दुन्यापोअ आपाआ जीत
“ईसु ओज ख्रिस्त होय” एहेलुहू जियाआ विश्वास होय तोंज देवोअ उबज्योहो. जों कोडो आब्हापोअ मेर कोअहे तों तियाआ पोर्यापोअ बी मेर कोअहे. जाहां आपू देवोपोअ मेर कोअतेहे आन तियाआ आदेश मानित लेतेहे, ताहां यावाअहीं आपुहूं होमजाअहे के आपू देवोअ पोऱ्यापोअ मेर कोअतेहे. देवोपोअ मेर कोइलो अर्थ होय तियाआ आदेश पालन कोइलो; आन तियाआ आदेश कठीण कायनाहां. काहाके जों कोडो देवोअ उब्ज्योहो तों दुन्याहां जिकीत लेहे आन जिहीं वाअहीं आपू दुन्याहां जिकतेहे तो आपाआ विश्वास होय. दुन्याहां कोडो हारवीत सेकेहे? फक्त तोज माहुंउं जों एहेंकोइत विश्वास कोअहे के, “ईसु ओज देवोअ बेटुह्हू होय.”
ईसु ख्रिस्ताआ बाप्तिमेहें साक्शी
ओ तोज होय जो पाअयोंवाईं आन रक्तावाईं आयुतो; मोन्ज्ये ईसु ख्रिस्त; पाअयोंवाअहीं एतुज नाहां पोन, पाईं आन रक्तावाअहीं आयुतो. आन जो साक्शी आपेहे, तो आत्मा होय; काहाके आत्मा सत्य होय. साक्शी आपनारे तिनू होय, आत्मा, पाईं आन रक्त; तिनू बी एक हारकी साक्शी आपतेहे. आपू माहुंउं साक्शी मानित लेतेहे, पोन देवोअ साक्शी तिया रोत जाअखी खोरी होये; आन देवोअ साक्शी ए होय के, तिये तियाआ बेटाह्हाअ बाप्तिमेहें साक्शी आप्यीही. जों देवोअ बेटाह्हापोअ विश्वास मिकेहे तियाआज मोनोमेहें साक्शी होय. जिये देवोपोअ विश्वास ने कोअयू, तिये देवोहो ठोग समजीइयुहू, काहाके जे साक्शी देवे तियाआ बेटाह्हाअ बाप्तिमेहें आप्यीही तियीपोअ तिये विश्वास ने कोअयू. आन ते साक्शी ए होय के, देवे आपुहूं अमर जिवन आप्योहो आन ओं जिवन तियाआ बेटाह्हाम होय. जियाहा देवोअ बेटुह्हू जोड़्युहू तियाहा जिवन जोड़्योहो; आन जियाहा देवोअ बेटुह्हू ने जोड़्यू तियाहा जिवन ने जोड़्यो.
अमर जिवन
देवोअ बेटाह्हाअ नावोपोअ विश्वास मिकनारा तुमापोअ अमर जिवन होय, ओं तुमुहूं समजाअहूं जोवे कोत आंय तुमुहूं ओं लेखोहो. आन आमुहूं देवोपोअ भरिवसू होय, काहाके, तियाआ मोर्जीपोअ जों किबी आपू मागतेहे, ताहां तो आपाअ गोठ उनाइत लेहे. जेताआ बी आपू मागतेहे, आन जों बी मागतेहे ताहां तो आपाअ उनाइत लेहे, तेहेलोज आपुहूं ओं बी मुंदू होय के, जों किबी आपू तियापोअ रोत माग्योहो तों जोड़्योहो.
जर एखा विश्वासीही एहेलुहू पाप कोअत्लो देखहा, जियाअ फल मोत कायनाहां, ताहां देवोहो प्रार्थना कोअहूं जोवे मोन्ज्ये देव तियाहा जिवन आपे; जियाआ पापोअ फल मोत ने ओय तियाहाज ओं लागू पोड़ेहे. पोन, एहेलुहू बी पाप होय जियाआ फल मोत होय, एहेलाआं काजे तुमू देवोहो प्रार्थना कोअजा एहें आंय नाहां कोतू. आक्खी जातीइ खाराब कामे ताम पाप होय, पोन एहेलाहा बी पाप होय के, जियाअ फल मोत कायनाहां.
आपुहूं मुंदू होय के, जों देवोअ पोऱ्यो होय तों पाप नाहां कोअतो; काहाके, देवोअ बेटुह्हू तियांहां वासाड़ीत मिकेहे. आन सैतान तियाहा आथ नाहां लागाड़ीत सेकतु.
आपुहूं मुंदू होय के, आपू देवोअ होय, आन पुरी दुन्या तिया खाराबोअ ताबाम होय.
आन आपुहूं ओं बी मुंदू होय के, देवोअ बेटुह्हू आवित लागुहू आन तिये आपुहूं एहलीही ओकल आप्यीही, के आपू तिया खोरला देवोहो ओलखीत सेको, आन आपू जें तिया खोरला देवोमेहें रोतेहे मोन्ज्ये देवोअ बेटाह्हा ईसु ख्रिस्तामेहें रोतेहे. ओज खोरलु देव आन तोज अमर जिवन होय.
माआं पोऱ्या, तुमू सोताहा मुर्तीपुजा रोत सेटे रोजा.
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.