Yakomba

Mukanda uje uasonekele

YAKOMBA

Citsindikisi

Livulu lia Yakomba valisonekele kuli umo ivatumbula nguavo Yakomba. Ou ikeye vene Yakomba munaina ya Yesu, uje uapuile ntuama ku cikungulukilo ca kulivanga kaha uapuile umo uavo vaka mpunga ya Yelusalema (Vilinga 15:13) Kaha kanganda Paulu uamusanene nguendi ‘cisimi’ ua cikungulukilo (Ngalata 2:9) Vaka kulilongesa cikuma vatsiliela nguavo livulu lia Yakomba valisonekele kusetekesa mu miaka yakupua makumi atanu (50) hanima ya kusemuka ca Kilistu. Muomu Yakomba ikeye uapuile ntuama mu cikungulukilo ca ku Yelusalema, kaha uasonekele livulu eli oku tele ali kuje.

Yakomba uasonekelele livulu liendi ku “miyati likumi na ivali” ije ya lishandokela mu mafuti (1:1) Vilongesa vije vili muli Yakomba vasa kulikuasesavio kuli vaka Kilistu voshe vuno honi vukuasi vua lizi “Likumi na ivali lia miyati” cimuesa vene ngeci cilivene Yakomba uasonekelele lika kuli vaka Kilistu va Vayunda. Muomu eli livulu valipangelele linga lihete ku vantuama vavengi, lili nakuhandeka ha mitue yaingi. Yakomba ali nakuhakela mana cikuma ha vusamba vua lutsilielo na vilinga. Lutsilielo lua vusunga vakalumuesa mu vilinga 2:17 Kaha naua uakele nakunangula ha kahangu kuli vaka kufuka 2:1-4 kaha nakutuleka linga tuzangame kuli vije vitukahandeka 3:1-12

Muvana vitumbikilamo

1. Yakomba ahana vihindu ku vantu vaje vasonekelele 1:1

2. Cakuhatako asimpisa vaka Kilistu linga vakolese mu tuyando 1:2-27

3. Ambahoni ahandeka muje vati casiua lutsilielo kulumuesa kuhitila mu vilinga 2:1-26

4 Hanima yevi ahandeka vati muje mezi asa kukala na nzili 3:1-12

5. Kaha Yakomba alumbununa muje vati mana a Njambi mualisezelamo na mana a mavu 3:13; 4:10

6. Cakuhatako anangula vantu vendi vaje vasonekelele ha kulihalesa 4:11; 5:6

7. Yakomba amanusula livulu liendi 5:7-20 mukuhana vishika lika.