1 Yiuano

Mukanda uakulivanga uasonekele

YIUANO

Citsindikisi

Mukanda ua Yiuano uakulivanga va usonekele kuli kanganda Yiuano mukati ka miaka makumi atanu na cihita ca miaka (50-100) hanima ya kusemuka ca Kilistu. Yiuano kalimuesele ngue ikeye uje uasonekele ou mukanda, vuno honi mu kapetulu uakulivanga amuesa ngeci Yiuano ikeye mukaleho ua vuyoye na kusanguka ca Yesu (1: 1-3) Sonekesi ya mukanda ua Yiuano uakulivanga naua inalifu cikuma na sonekesi ije ili mu Muzimbu Uacili uje uasonekele Yiuano. Vacitsiliela ngeci Yiuano ikeye uasonekele Muzimbu Uacili ua Yiuano na mikanda itatu ya Yiuano uakulivanga, na Yiuano uamucivali na Yiuano uamucitatu oku tele ali mu Efeso.

Yiuano uasonekele ou mukanda kuli vaka Kilistu voshe ha ntsimbu ije omo cikungulukilo tele cili mutuyando tuje tuvanehele ku civunga ca vantu vaje va vatumbula nguavo ‘Vanginositike.’ Vanginositike vakevo vantu vaje vatsiliela ngeci Yesu ikeye vene Njambi vuno honi kapuile muntu uje ali na muvila uantsitu na maninga muje tele muakele ha mavu. Ha cuma eci, mukemo Yiuano uasonekele ngeci ikeye mukaleho ua vuyoye vua Yesu naua nguendi ikeye uakuatele Yesu na mavoko endi 1:1-3 Vutumbe vua Yiuano ha kusoneka ou mukanda vuapuile ngeci ashulisise nzolela yendi 1 Yiuano 1:4, na kuvindika vaka kutsiliela ngeci keti valinge vipi 1 Yiuano 2:1, na kuohiela vaka kutsiliela ku vilongesa via makuli 1 Yiuano 2:26, na kukolesa vaka kutsiliela ngeci cilivene vanovoka 1 Yiuano 5:13

Muvana vitumbikilamo

1. Yiuano aputuka kuhandeka ha mukanda uendi na kuhana vutumbe vumo vuje vika uasonekelele mukanda ou 1:1-4

2. Ambahoni Yiuano alumbununa vati muje Njambi uapua ceke naua ngeci tunapande kuyoya ngue muje muayoyele Yesu 1:5; 3:10

3. Cakuhatako Yiuano atuvulukisa ha cishika cije ngeci tunapande kulizanga umo na mukuavo 3:11; 5:12

4. Kaha Yiuano amanusula mukanda uendi mu kapetulu 5:13-21