Mahongezo

MAHONGEZO

Ulongoelo

Kitabu cha Mahongezo ni kitabu cha ngelo kikulonga mbuli yo kumoligwa kwo mzi wa Yelusalemu. Mwandisi wa Mahongezo hakukelavanya, mna wawandisi watuhu wa kale we Kiyahudi na want'hu wakumhuwila Kilisito wahuwila kugamba mlotezi Yelemia niye awandikaga. Want'hu awa wahuwila ivo kwaviya kitabu icho kinula ulosi wa kumoligwa pele kwo mzi wa Yelusalemu. Mafani vadahika chawandikwagwa mwo mwaka 586 aho Kilisito andaga akei kwelekwa, umwo Yelusalemu wize umoligwe. Mna vadahika ni aho wize uzengwe uhya niyo Nyumba ya Mnungu yaikwa kwajili ya Mnungu, aho mwaka 516 umwo Kilisito andaga akei kwelekwa. Vadahika kitabu hicho chawandikagwa ni mnt'hu ekalaga hagihi no lupisi lwo kumoligwa kwo mzi uwo, mwo mwaka 586 aho Kilisito andaga akei kwelekwa. Kitabu chose cha Mahongezo chalagisa kinyulu kwa want'hu wa Yelusalemu. Hamwenga na kugamba Yelusalemu yamoligwa na kukump'hukilwa ni fyo dya watowani wa Babeli, mna muwandisi we kitabu iki cha mahongezo awandika kugamba, aya yalailaga kwajili Mnungu andaga akawasulumiza want'hu wa si ya Yuda (mnango wa 1:12). Mungu awasulumizaga want'hu Yuda kwa kwombokela watowani wa Wababeli awo waikump'hukilaga isi iyo. Mwandisi uyu ywe kitabu cha Mahongezo akei akumbukila uhuilwa wa Mnungu. Mwe kinyulu chakwe alonga kugamba, lukunde lwa ZUMBE holukudunduga, naho kugamba mbazi za ZUMBE zikei zagendeela, (mnango 3:22). Kwo uheelo mwandisi we kitabu abindiliza kwa kumlombeza Mnungu awavuze want'hu wa Yuda.

Ayo yemndani mwe kitabu:

Utambalisi we kinyulu kwajili ya masulumizo ayo Mnungu awegaile want'hu wakwe na kumoligwa kwo mzi wa Yelusalemu. Mnango wa nk'hongo na wa kaidi

Mwandisi akumbukila uhuilwa wa Mungu na kulombeza wambizi. Mnango wa katatu.

Kuvuzagiza kutambalisa ikinyulu na masulumizo yaihile ya want'hu wa Yuda. Mnango wa kane.

Mwandisi abindiliza kwa kumlombeza Mungu awavuze want'hu wa si ya Yuda. Mnango wa shano.