Yoshua

Kitabu cha Yoshua

Yosh

ULONGOELO

Kitabu cha Yoshua ni magendeelo ye simulizi ya si ya Izilaeli ikakongela hadya kitabu che zisigilizi chaheelaga. Want'hu wa Izilaleli wakongela kwo uheelo wa zuwa dyo mto wa Yolodani. Ivo kitabu cha Yoshua chalonga ivo Waizilaeli wadendelukaga umto wa Yolodani no kuiguha isi ya Kanaani wakalongozwa ni Yoshua uyo andaga kilongozi ywa Waizilaeli aho Musa eze abanike. Want'hu awo watendaga viligane na ivo Mnungu awasigiilaga watende. Naho kwa kutenda ivo Mnungu andaga kakint'hiza kiya amlaganaga Ibulahimu kugamba naawenk'he welekwa wakwe Ibulahimu isi ya Kanaani. Haimanyike kugamba niani awandikaga kitabu cha Yoshua. Mwandishi uyu alonga nk'hanana nyingi na hant'hu hengi enga kugamba yehe naye andaga aaho umwo ayo yakalaila. Yosh 5:1,6. Ivi nivo vikuleka wanamp'hina wengi wafanyanya kugamba Yoshua kawandika hant'hu hakulu mwe kitabu iki. Mna ni kindedi kugamba mwiyuko mtuhu muwandikwe ni want'hu watuhu kikamleka Yoshua, enga via kumoselwa msanga kwa Yoshua, Yosh 24:29. Wana mp'hina watuhu wahuwila kugamba kitabu chawandikwagwa miaka magana mnane yomboke kukongela aho Yoshua eze ande kabanika. Zimbuli zimwenga zimwe kitabu cha yoshua zalailaga miaka alufu imwenga na magana maidi na milongo mishano aho Yesu kilisito andaga akei kwelekwa, vikudahika kugamba yandaga miaka milongo mine yomboke yo kulongoza kwakwe Lamesesi uko Misili. Yafanyanywa kugamba seuta Lamesi alongozaga uko Misili mwo lupisi umwo waizilaeli wandaga wakahalawa Misili. Ukul 1:11.

Ayo yemndani: 1 Mnango wa nk'hongo kubula wa shano, mwalongwa ivo Wazilaeli wadendeluke mto Yolodani no kwingila mwe isiya Kanaani. 2 Mwo manago wa shano no msitali wa mlongo na mitatu kubula mwo mnango wa mlongo na kaidi mwasimuilwa ivo Waizilaeli waiguhaga isi ya Kanaani. 3 Mwe milango ya mlongo na mitatu kubula milongo miidi na umwenga umwomwalongwa ivo isi ya Kanaani ipangilwe amakabila ya Waizilaeli. 4 Mwe nk'homelezo, milango ya milongo miidi na miidi na milango ya milongo miidi na mine, yalongwa mwa makabila yamwenga ya Izilaeli yauyaga kwe nt'hendelo ya ulailo wa zuwa wo mto Yolodani, no ukubanika kwa Yoshua no kumoselwa msanga kwakwe, na ivo Indagano ya Wazilaeli yatendwagwa kunda mp'hya.