Yakobo

BALUWA IWANDIKWE NI

YAKOBO

ULONGOELO

Kitabu iki chawandikagwa ni Yakobo. Ino yadahika Yakobo nduguye ywa Yesu uyo andaga kilongozi we difyo dya nk'hongo dya wahuwila wa Kilisito naho andaga ni yumwenga mwe kitala cha Yelusalemu Mitendele 15:13. Iviyaiviya Paulo mwe baluwa yakwe amwitangaga Yakobo mwigamo wa mafyo ya wahuwila wa uko Galatia 2:9. Wanap'hina nawahuwila kitabu icho chawandikagwa myaka milongo mishano aho Kilisito andaga kelekwa kale, kukongela aho Yakobo andaga kilongozi wa mafyo ya wahuwila wa uko Yelusalemu, vadahika akiwandikaga kitabu iki umwo andaga uko.

Yakobo nakakibilikiza kitabu chakwe mwe makabila mlongo na maidi ayo yasambale mwe ziisi 1:1 Mahinizo ya Yakobo ni kwajili ya Wakilisito wose mna kwa kugamba “makabila mlongo na maidi” Ino ni kugamba yadahika awawandikilaga Wakilisito wa Kiyahudi. Kwaviya kitabu iki nekinda na mzungu kisomigwe na want'hu we hengi naho chasimuila mahinizo mengi. Yakobo nakataila mwe mbuli yo uhagihi wo mhuwi ne mitendele. Mhuwi we kindedi nouwoneke mwe mitendele 2:17. Iviyaiviya akanya wagoli na wakiwa mwe mbuli yo kwazagula 2:1-4, no kukigambila kunda na wengele mwe yadya kikulonga 3:1-12.

Yemndani

Mwo mnango wa 1:1, Yakobo alamsa vilongozi wakwe.

Mwo mnango wa 1:2-27, Yakobo awagela moyo Wakilisito wafinyilize umwo wakasulumizwa.

Mwo mnango 2:1-26, Yakobo alonga ivo vikuungwa mhuwi kulagiswa kwa mitendele.

Mwo mnago wa 3:1-12, alonga naho ivo mbuli i ivo ikudaha kunda na ludole.

Mwo mnango wa 3:13-4:10, Yakobo alonga mzungu wa Mnungu ivo hewikuliganyizwa na mzungu wa want'hu.

Mwo mnango wa 4:11-5:6, Yakobo awakanya want'hu wakwe wakusoma wasekukefenya.

Mwo mnango wa 5:7-20, Yakobo abindiliza kitabu chakwe kwa malagizo yo wikazi wa mazuwa yose.