Ezila

Kitabu cha Ezila

Ezil

ULONGOELO

Vitabu va Ezila na Nehemia vasimuila ivo Waizilaeli walekelwagwa kuuya Izilaeli, umwo weze wande waguhigwa kwo utahigwa uko Uajemi na Babeli. Ezila alongesa mwa ivo waizengaga uhya inyumba nk'hulu ya Mnungu uko Yelusalemu. Wahinizi we miko awengi wahuwila kugamba Ezila niye awandikaga vitabu ve Misimo cha bosi na cha kaidi, hamwenga ne kitabu va Ezila na kitabu cha Nehemia. Uneva hiyo Ezila, elo yaoneka eyuko mnt'hu mtuhu awandike vitabu ivo vose. Simulizi ye kitabu cha Ezila chadahika nekiwandikwa mwe miaka ya magana mane na milongo mine, aho Zumbe Yesu andaga akei kwelekwa, mna mmwenga mwe kitabu icho vadahika mwawandikwagwa mwo lupisi lutuhu. Kitabu cha Ezila chalagisa ivo Mnungu amtendaga seuta Koleshi ywa Uajemi awalekele Waizilaeli wauye kwe isi yawe na kuzenga uhya inyumba nk'hulu ya Mnungu. Mbuli iyo yalagisa kugamba ulotezi wa Yelemia ukint'ha. Yelemia mnango wa milongo miidi na kenda na msitali wa mlongo kubula mlongo na kane. Kwandaga na wank'hondo wandaga wakahiga ukuzenga uhya kwe nyumba ya Mnungu, naho niyo ndima iyo yakimala kwa lupisi, mna hata ivo Waizilaeli wadahaga kubinda ukuzenga uhya inyumba nk'hulu ya Mnungu kwa wambizi wakwe. Naho mwo ulongozi wakwe Ezila uwambize Waizilaeli wakweiile kwajili yo wavu wawe. Uno wandaga ni uhya wawe wa kukeika mwo kutoza Imiko ya Mnungu. Yemndani mwe kitabu cha Ezila: 1. Mwalongwa ivo seuta Koleshi awalekelaga Waizilaeli wauye kwe isi yawe hamwenga no ludongo lwe zimp'huga zauyaga. Ezila mnango wa nk'hongo na wa kaidi 2. Mwalongwa imbuli ye Nyumba ya Mnungu uko Yelusalemi ivo yazengwagwa uhya. Mnango wa katatu kubula wa mtandatu 3 Mwalongwa ivo Ezila auyaga Yelusalemu akanda na mp'huga nyingi za Waizilaeli. Mnango wa mfungate kubula mnango wa mnane 4 Mwasimwiilwa ivo Ezila awalongozaga Waizilaeli kuvuza uhya Ndagano na Mnungu. Mnango wa kenda kubula mnango wa mlongo: