Mbilikizi

Mbi

Mbilikizi

ULONGOELO

Kitabu iki cha Mbilikizi chahiniza mzungu mwo wikazi. Icho kikulongwa mwe kitabu iki enga ivo kitapitwe kulawa mwo ulosi wa Kiibulania, nuko kugamba, “Mnt'hu akuduganya want'hu.” Wamanyi wengi wahuwila kugamba seuta Selemani niye mwandisi ywe kitabu iki, mna wamwenga hawakuhuwila ivo. Selemani ekalaga kwe miyaka ya 970-931 umwo Kilisito andaga akei kwelekwa, naho niyo miyaka ikitabu iki chawandikagwa. Mna wamanyi watuhu wahuwila kugamba kitabu iki chawandikagwa ni mtuhu kwaviya mwo lupisi ulo ulosi noukalongeswa ni ulosi wa wandima kujink'ha wa seuta. Mbilikizi 5:8-9. Wamanyi awo wafanyanya kugamba kitabu cho Mbilikizi vadahika hachasunguzaga kuwandikwa, vadahaika ni hagati yo mwaka 400 na 200 aho Kilisito andaga hanati kwelekwa. Mbilikizi akonga na ulosi akagamba, kila kint'hu ni enga mp'heho ikusunguza kwaganika 1:2. Nuko kugamba wikazi wetu ne zindima zetu ni za lupisi du naho ni vidala kuhuwila. Aya yose nayajaligwe kwa lupisi lugihi. Yose aya hayamuli mwo udahi wetu. Ivo ni vedi kuuzumila wikazi enga ivo wili na kuzungula kinyemi kwa kiya kinanacho 9:9. wa kubindiliza kitabu iki, Iki ni kint'hu hekikuungwa kusweswa, fanyanyi mwa madala yose na kinyemi mwo wikazi ni kumwogoha Mnungu na kudamanya yadya akukigamba kidamanye 12:13.

Ayo yemndani:

Kitabu cho mbilikizi, chamtambula mwandisi ywe kitabu hamwenga no wikazi wakwe. Msafa 1 kuita 11 mwo mnango wa nk'hongo.

Iviya iviya mwe kitabu iki mmbilikizi akanya. Mnango wa 1:12 mpaka 6:9.

Kwalavigwa ulangilizi wa mhinizi. Mnango 6:10 mpaka 12:8.

Kwo uheelo, wadadazula ikitabu kwa kugamba ukutaila kwose kwo wikazi ni kumwogoha Mnungu na kudamanya yadya akugamba kidamanye, mnango wa 12 msafa wa 9 mpaka 14.