2 Wasesalonike

BALUWA YA KAIDI YA PAULO KWA

WASESALONIKE

ULONGOELO

Baluwa ya kaidi kwa Wasesalonike yawandikagwa ni mwigala Ulosi Paulo 1:1. Baluwa ino aiwandikaga lupisi lugihi na idya ya nk'hongo ya Wasesalonike, yandaga ni myaka milongo mishano na umwenga aho Kilisito eze ande kelelwa. Paulo andaga akei uko Kolinso umwo andaga akaiwandika ibaluwa ino ikuita kwe difyo dya wahuwila wa Kilisito wa Sesalonike idifyo adikongaga mwe nt'hambo yakwe ya kaidi yo kubilikiza Mbuli Yedi Mitendele 17:1-10. Mwe kitabu yalongwa kugamba Idifyo dya wahuwila dyandaga dya Wayahudi wageke na Wagiliki wengi.

Yaoneka idifyo dya wahuwila wa Kilisito uko Sesalonike dyaungwa disekujala mazuwa yo uheelo no uziilo wa kaidi wa Kilisito kwaviya Paulo kawandika mbuli nyingi mwe zibaluwa zakwe zose zimbili kwa Wasesalonike. Baluwa ya kaidi ya Paulo kwa Wasesalonike yalongesaga ivo nevinde kwa mazuwa yo uheelo no kuuya kwa Kilisito. Iviyaiviya Paulo kakanya mwe mbuli ya want'hu hewekuunga kudamanya ndima. Kugamba kila mnt'hu aungwa kudamanya ndima kwa kukezunguila nk'hande 3:6-10.

Yemndani

Mwo mnango wa 1:1-2, Paulo akonga ibaluwa yakwe kwa kuketambalisa mwenye hamwenga na wadya wakutimilana naye.

Mwo mnango wa 1:3-12, Paulo amtogola Mnungu kwajili ya wahuwilwa Kilisito wa Sesalonike no kuwalombezela kwa Mnungu.

Mwo mnango wa 2, Paulo alonga mbuli ya mazuwa yo uheelo.

Mwo mnango wa 3:1-15, Paulo alonga mbuli ya want'hu hewekuunga kudamanya ndima.

Mwo mnango wa 3:16-18, Paulo abindiliza kwa kulamsa kaidi idifyo dya wahuwila wa Kilisito.