2 Petulo

BALUWA YA KAIDI YA

PETULO

ULONGOELO

Baluwa ya kaidi ya Petulo yalagisa kugamba yawandikagwa ni Mwigala Ulosi Petulo, mna wamanyi wengi dielo wafanyanya kugamba hiyo kindedi. Wagamba yadahika kugamba mnt'hu mtuhu niye awandikaga hant'hu ha Petulo. Awandike halongile uwona kugamba yehe mwenye amuwonaga Yesu, vitendese hadya Yesu eze ahituke ifuta yakw, 1:17-18. Uneva Petulo niye awandike ibaluwa ino, yadahika kugamba awandikaga umwo andaga akei kubanika, mwo uheelo we miyaka ya milongo mtandatu kulawa aho Yesu eze elekwe. Naho Petulo aitanga baluwa ino kunda ni ya kaidi, 3:1 akaika talehe yo kuiwandika baluwa ino, aho eze abinde idya ibaluwa ya nk'hongo ya Petulo. Baluwa ino awawandikilaga want'hu wose wamhuwile Kilisito.

Petulo awandikaga baluwa ino vileke awagele moyo want'hu wakumhuwila Kilisito wekale vedi na kuwakanya wasekuwatimila wahinizi wa udant'hi 2. Awagela moyo wawabele want'hu wakugamba Yesu ekalisa kuuya, vituhu vakwe awalagisa kugamba Mnungu hakwikalisa mna aunga kila mnt'hu ayokolwe 3:8-9. Ivi nivo vikuleka want'hu waungwa kwikala wikazi wedi 3:14.

Yemndani

Mwo mnango wa 1:1-2, Petulo aketambula mwenye na want'hu akuwawandikila.

Mwo mnango wa 1:3-21, Petulo akumbusa want'hu wekale wikazi wedi kwaviya chekala ivo kwa udahi wa Mnungu.

Mwo mnango wa 2:1-22, Petulo awakanya want'hu mwe mbuli ya wahinizi wa lulimi na kulonga kikuunga kiwapate awo wahinizi wa lulimi uko kwo uheelo.

Mwo mnango wa 3:1-17, Petulo abindiliza kwa kuwagela moyo want'hu wakumhuwila Kilisito kwikala wikazi wedi na kukeika lumwe kwa kuuya kwa Yesu.