1 Kings

Kitabu che nk'hongo cha

MASEUTA

Ulongoelo

Kitabu cha nk'hongo na cha kaidi cha Maseuta, aho nk'hongo chandaga kitabu kimwenga kikulu. Bosi kabisa vapangagwa na kunda vitabu viidi mwe Bibilia ya Septuaginti, Kitabu icho chandaga nicho cha nk'hongo kujink'ha vose mwe Ngagano ya Kale mwo ulosi we Kigiliki. Haikumanyika kugamba niani awandikaga vitabu va nk'hongo na cha kaidi cha Maseuta, hegu na kuviika vedi enga ivo vili haluse. Muwandisi we vitabu va maseuta mwo kuwandika kwakwe akauilaga mwe zink'humbukila za kale mwo kuviwandika, (kaula mwe Maseuta wa nk'hongo mnango 11:41, 14:19, 14:29 kunda niyo miliganyizo ikulavanya ikindedi icho). Naho haimanyikise kugamba vitabu ivi vawandikwagwa ini hamwenga na kuikwa mwo uwedi wakwe. Ni kindedi kugamba vahezaga aho seuta Yekonia eze alekelwe kulawa kwe samo uko Babeli mwo mwaka 561 aho Kilisito andaga akei kwelekwa. Viligane ne kindedi kugamba mbuli ino ltambaliswa vedi mwe Kitabu cha Kaidi cha Maseuta 25:27. Wamanyi wengi we zimbuli ze Bibilia wahuila kugamba hant'hu hakulu mwe vitabu ivi hawandikagwa miyaka mingi lupisi ulo.