Misimo

Kitabu cha nk'hongo che Misimo

MISIMO

ULONGOELO

Aho bosi vitabu viidi va nk'hongo ve Misimo vandaga ni kitabu kimwenga kikulu. Chapangwagwa kunda vitabu viidi na kwitangwa Septuajinti aho kize kitapitwe kwa Ulosi we Kigiliki mwe Ndagano ya Kale kulawa mwe Kiibulania. Zina idi dye Misimo kwa ulosi wa Kiibulania, nuko kugamba, (“mbuli zilaile mwa mazuwa mengi yomboke.”) Wamanyi wengi wahuwila kugamba Ezila niye awandike vitabu ivi va nk'hongo na cha kaidi ve Misimo, hamwenga ne vitabu va Ezila na Nehemia. Muwandishi kaguha vyotoko vingi, vitendese ni kulawa mwe vitabu va Samweli na Maseuta vileke akint'hize vitabu ivi. Iviaivia wamanyi awo wahuwila kugamba vitabu ivi vawandikwagwa mwe nusu ye kaline ya shano aho Kilisito andaga akei kwelekwa, nuko kugamba ni umwo Ezila andaga akei mgima. Vitabu ivi ve misimo, che nk'hongo na cha kaidi vakonga na kutambula ludongo lwa wakale kukongela kwa Adamu kubula kwa Ibulahimu no kukonga kwe si ya want'hu wa Izilaeli na kubula aho waizilaeli wauyaga kulawa kwo utumwa. Kulawa aho vitabu ivi vasimuila mbuli za Waizilaeli kukongela ho uheelo wa seuta Sauli kubula kwo kubanangwa kwo mzi wa Yelusalemu ni want'hu wa Babeli. Uumwo mwe vitabu ve misimo muwandishi uyo kalongesa mwe mbuli ye Nyumba ya Mnungu uko Yelusalemu. Daudi afunganyaga vint'hu vingi na kuikila lumwe vint'hu vingi kwaajili yo uzesi we Nyumba ya Mnungu. Chayasoma ayo mwe kitabu che nk'hongo che Misimo mwo mnango wa milongo miidi na mnane kubula mnango wa milongo miidi na kenda akajika Selemani umwanawe niyo aizenga iyo Inyumba iyo. Ayo chayasoma mwe kitabu cha kaidi che Misimo mnango wa kaidi kubula mnango wa mfungate. Muwandishi iviaivia alonga ivo Nyumba ya Mnungu imoligwe no kupoligwa kwe vint'hu va kwe Nyumba ank'hulu ya Mnungu. Ayo chayasoma mwe kitabu cha kaidi che Misimo mnango wa milongo mitatu na mtandatu na msitali wa mlongo na shano kubula msitali wa milongo miidi na imwenga. Kwo uheelo msitali wo uheelo we kitabu cha kaidi che Misimo, mnango wa milomgo mitatu na mtandatu msitali wa milongo miidi na nt'hatu yalagisa ivo Nyumba ya Mnungu neizengigwe uhya.

Yemndani mwe Ikitabu cha nk'hongo che misimo.

Mnango wa nk'hongo kubula wa kenda, kiwandikwe aho nu ludongo lwa wakale kukongela Adamu kubula Izilaeli kuuya kulawa kwo utumwa.

Mnango wa 10 kubula milongo miidi na kenda yalonga wikazi wa Daudi no kulongoza kwakwe mwe Izilaeli.

Yemndani mwe kitabu cha kaidi che Misimo. Mnango wa nk'hongo kubula wa kenda. Milango iyo yalonga wikazi no useuta wa seuta Selemani ywa Izilaeli.

Mwe milango ya mlongo kubula mnango wa milongo mitatu na mtandatu, ni simulizi ya want'hu wa isi ya Izilaeli na Isi ya Yuda ivo zikepangile hamwenga ne simulizi ya maseuta walongoze Yuda kukongela mwo lupisi ulo kubula aho useuta wabulaga kwo uheelo wakwe.