LUKA 17

Pɛpɛ botaedja bana ba Ndjakomba mabaku

(Boindja pongono a Mat 18, 6-7.21-22; Mal 9, 42)

1Yesu abala na batingami ba nde bo: «Mabaku mabwaniti botaka. Endelo edii ndjokwa ta dii moto iyona olomakadea bato bakina ta ndjea e pekato! 2Ebɔngi na nde bamotingee ibanga inɛnɛ ta ekolo ko bamodumbe ta dua enɛnɛ, Asadaa apangoa nongo omɔti o ibibi bakɛkɛkɛkɛ ta pekato. 3Kebani na ino bɛnɛ!

«Mwangao aka okɔɔ bobe, modosa. Akadhima bobe bo nde, moyɛɛ. 4Akaokɔɔ bobe mbala sambo busa bomɔti ko akasɔmbɔ ta dii wɛ mbala sambo ta tina e bobala bo: “Nasaokei ndjokwa”, moyɛɛ.»

Bopilo bo edhimeli

5Bapɔsɔlu babala na Kumu bo: «Lonɛngedja edhimeli!» 6Kumu asɔmbedja bo: «Edhimeli e bino ekadaa ondingo mombuma mo mutalade, obwanini bobala na mole imumu bo: bikoa iyaya ko kɛɛ abikame ta dua, ko edii bokɔɔmɔ oko iboa.»

Lodii basali ba ngasa

7«Moto omɔti ta tei e bino akadaa na mosali iyoyo okaone gbie kao okayakedje bingbɛndɛ. Abwani bobala na nde ndelo esahula iyo ta gbie bo: “Doa ayake edɛdiyeye?” 8Pɛpɛ, abaladea na nde wɛtoko bo: “Kaleani miya nayake ta midi, ko hangodja bisendja ko doa abakeni miya ta mesa, nakasiedja boyaka ko bomwaka, wɛ oyakadea ko omwakadea e wɛ engbanga.” 9Asakoadea mosali omina o nde iyaya asa kokedja iyo bokɔɔ elomu e nde? 10Edii oko mondumba momɔti na nu pongono: ndelo ekɔi ino eka esusu eolomini ibo, odiini bobalani bo: “Lodii oko basali ngasa; lokɔi oko elomu ebwanaki na su bokɔɔ.”»

Yesu aheledji bato ba mabha doomi

11Iyana akɛɛkɛ Yesu ta Yelusalɛmɛ, alekedja ta pakasa e Samalia na Galileya. 12Ikwea di nde ta ngando emɔti, bato ba mabha doomi badoa asongana na nde. Ko baso baema bohali, 13ko baangɔdjɔ miholi ko babalia bo: «Yesu, Molehi, lookea ndjokwa!»1 14Iyana aɛnɛ Yesu bato bamina ko abala na bu: «Kɛɛ asainedjeni ta dii banganga2 ba Ndjakomba.» Amaka ibo kɛɛ, basɛnɔɔ oko na ndjea. 15Omɔti o bobo, amaka iyo ɛnɛ bo aheli, asɔmbɔ akumedja Ndjakomba na moholi mo diko! 16Asadumba ta mako ma Yesu, boso bo nde bodaaka ta kpɔtɔ, aso amosakoa. Moto omina iyona adaaka Mosamalia. 17Iboa Yesu amowadja bo: «Bato basɛnɔki badakiti doomi? Ko bakina ibuwa badii djɔ? 18Osa sɔmbɔ oto mokɛndɛli iyoyo bɛngi adoe akumedja Ndjakomba?» 19Ko Yesu abala na nde bo: «Angɔɔ ko kɛɛ; bodhima bo wɛ boheledji.»

Bodoa bo Bokumu bo Ndjakomba

(Boindja pongono a Mat 24, 23-28.37-41)

20Bapalisai bawadja Yesu ehole ndani edoabi Bokumu bo Ndjakomba. Abasɔmbedja bo: «Bokumu bo Ndjakomba botadoabi ondingo eka ekaɛnɛ ibo na miso. 21Batabalabi bo: “Indjani, adii iyaya!” kaoko: “Adii ibobo!” Modjɔ mo, Bokumu bo Ndjakomba bodii ta ndanda e bino.»

22Ko abala na batingami ba nde bo: «Ta masu ma ngɔngɔ odaabini na posa e boɛnɛ isu dimɔti di masu ma Mwana o moto, endelo otamoɛnɛbini. 23Baotɔndeabini bo: “Adii ibobo!” kaoko bo: “Adii iyaya!” Pɛpɛ bokɛɛni iho, pɛpɛ bobakimanani. 24Modjɔ mo, oko mondumba mokadonge mokalikali ta busa mokabwanedje pamba djisusu, busa bo Mwana o moto bodaabi oko boa. 25Endelo boso mɛnɛ etungi na nde booka saya enɛnɛ ko bato ba mbota iyeye bamodumbadea. 26Busa bo bodoa bo Mwana o moto bodaabi oko ondingo ehole e Noa. 27Bato bayakaka ko bamwakaka, ko baasɔnɔkɔ bali na baami, mbunoko busa bokwea Noa ta masuwa: ko pela enɛnɛ edoa e baowa3 ibo basusu. 28Edaabi pongono boa ondingo ehole e Lɔtɔ: bato bayakaka, bamwakaka, basombaka, batɛkɛkɛ baonaka gbie, bapikaka ndako; 29endelo busa boimana Lɔtɔ ta Sɔdɔmɔ, mbuwa o mosa ko na mangɛlɔ lodonga diko ko loangodja bato basusu bagwa4. 30Edaabi oko mondumba momina momɔti ta busa boɛnɛmɛbi Mwana o moto. 31Busa bomina, moto iyona odaabi ta mbalasani etonga bo diko di ndako atatitabi bɛngi atombe5 leka lo nde; ko moto iyona odaabi ta gbie asɔmbetebi ta ndako. 32Lɛdjɛni mondumba mokɔɔmɔ na mwali o Lɔtɔ! 33Moto iyona ohombabi bobanea bomɔ bo nde abobungedjabi; ko, iyona obungedjabi bomɔ bo nde abobaneabi. 34Naotɔndeeni bo, ta bulu bomina, bato babae basamabi ta esambe emɔti: omɔti atombamabi ko okina adikabi. 35Bali babae badaabi bainda mbuma ta ekpongbolo emɔti: omɔti atombamabi ko okina adikabi. [ 36Baami babae badaabi basala ta gbie emɔti: omɔti atombamabi ko okina adikabi.6]» 37Batingami bamowadja bo: «Kumu, modjɔ momina mokɔɔmobi djɔ?» Ko abasɔmbedjia bo: «Esika edaabi ebembe esambi, bingbondo7 balumanabi ena.»