Skip to content
BibleKenya

Miwera

BIKƆMELI BI BA PƆSOLU 3

Moomi omɔti o mako makatatake aheli

Busa bomɔti ngɔngɔ dji midi, Petelo na Yoane baiweaka aangɔnɔ ta tepelo ta ngonga e basato e ngɔngɔ dji midi. Edaka na moto omɔti o mako makatatake donga ta bobotama bo nde, adaaka mbuti na modipe mo tepelo, mobeaka bo «Modipe Mopele.» Engi busa badoaka na nde ko bamodedjaka ena bɛngi asɛngɛke leka ta dii bato ibia badaaka bakwea ta tepelo. Aɛnɛ yo Petelo na Yoane bakɛkɛ akwee ta tepelo ko abasɛngɛ makota. Petelo na Yoane bamotingea miso ko petelo abala na nde bo: «Lokokoledja!» Moto omina aso abaindja bopele mɛnɛ, modjɔ mo alɛnɛkɛ bo abwani bodia moeka ta dii bo. Iboa Petelo abala na nde bo: «Mbi napeliti palanga, kaoko wolo, endelo edɛdiyeye naopakadea eka edii na mbi ta kombe e Yesu Kilito o Nadjalɛtɛ, angɔ ko dala1!» Ngɔngɔ djimina amopea na ebɔ e baami, bɛngi amoangɔdje. Na mbala emɔti, mako ma nde na gaga dji nde djininoa; Na mbala emɔti aema diko, apimboa na mako ma nde ko aso abanga bodala. Akwea engbanga emɔti na bu ta tepelo akɛkɛ adale, apimboe ko na bokumedja Ndjakomba. Emumu e bato basusu bamoɛnɛ akɛkɛdea adale ko akumedje Ndjakomba. Ehole emodjeba bo edii wɛtoko iyo moto iyona odaaka na mobondo ta Modipe Mopele mo tepelo bɛngi asɛngɛke leka, ibo basusu baluma na bɔɔ ko na bokamoa ta tina e modjɔ imua mokɔmɔ na nde.

Petelo atingodji modjɔ momina mobokamoa

Moto omina aipalaka bokina Petelo na Yoane, bato basusu balumaka na bokamoa, bapota mbuti na bu ta mbalasani ebeaka bo «Mbalasani e Sɔlɔmɔ2». Ndelo eɛnɛ Petelo modjɔ momina, abala na emumu e bato bo: «Ino bana ba Isalɛlɛ, tina ndani okamwakadeani na modjɔ momina? Oloindjakadeani iboa ondingo moto yo adali mɔndɔ na ngulu e biso bɛnɛ kaoko edii wɛtoko bosapa bo biso na Ndjakomba? Ndjakomba o Abalayama, o Isaka ko o Yakobo, Ndjakomba o bakɔkɔ ba biso3, ainedja ekumu e mosali onde Yesu. Ino bɛnɛ omokabakani ko omolonani ta boso bo Pilato, iboa iyo atombaka meko e bomotingoa. Olonani moto iyona odaaka Mosɛnɔke ko iyona odaaka Moto o Bodju ko ohɔni baotingoeni mooweli o bato4. Iboa oowedjani Kumu o bomɔ. Endelo Ndjakomba amosisodja ta tei e bato bago ta modjɔ momina iso lodii ba temo. Moto iyo oɛnɛkɛdeano ko odjebakadeano, edii wɛtoko kombe5 e Yesu ko na edhimeli e nde adii iyo. Edii edhimeli ta dii Yesu eka ekɔi bo ahele na bosusu mɛnɛ mondumba moɛnɛkɛdea ino basusu.

«Ekahia, dengani, mbi nadjebakadea bopele bo ino na bakondji ba bino okɔkini modjɔ momina na taka e bodjeba. Endelo Ndjakomba akokedja iboa midjɔ misia iyo botɔndɔ ehele ta minɔkɔ mi batɛli basusu; abalaka bo Masiya o nde aokabi saya6. Na boa, hombedjani mida ko doani ta dii Ndjakomba bɛngi akutubanedje pekato dji bino. Iboa Kumu alomadea ehole e eheme ko aolomeadeani Yesu, Masiya iyona ohɔɔ iyo ehele ta tina e bino. Edɛdiyeye, etungi na nde adae ta busa mbunoko ehole eimeadea midjɔ misusu yeene mondumba motɔndeaka Ndjakomba ta minɔkɔ mi batɛli ba nde basɛnɔke donga ehele. Na tina emina Mose abala bo: “Kumu Ndjakomba aolomeadeani motɛli omɔti oko ondingo mbi, iyo odadea omɔti ta ndanda e ekomi e bino. Ookadeani midjɔ misusu mibaladea iyo na nu. Moto mosusu o dadea pɛpɛ bookea motɛli omina adongedjamadea ta tei e bato ko aowamadea7.” Batɛli basusu babalaka bobanga ta ehole e Samwɛlɛ, ko na batitani ba nde batɛlɛkɛ midjɔ mi masu imi. Ndikano ekɔɔ Ndjakomba na batɛli edii tina e bino, ko odiini na ibondo ta mokongo mokɔɔ Ndjakomba na bakɔkɔ ba bino ehole ebala iyo na Abalayama bo: “Nadjongoadea mabota masusu ma ngondo na ndjea e batitani ba wɛ8”. Na tina emina, Ndjakomba aimedji boso Mosali o nde tina e bino, amolomi bɛngi aodjongoeni ko na adongedja moto mosusu ta tei e bino ta ndanda e mikɔ mibe.»

Source notes (8)
  1. Footnote Mikanda mikina midiiti na ango.
  2. Footnote Mbalasani emina adaaka ta pamba e boso iyena edhimeanaka bato ibia badaaka pɛpɛ bodaa Bayudha ta tepelo e Yelusalɛmɛ. Boɛngɛ 5, 12; Yoane 10, 23.
  3. Footnote Boindja Boi 3, 15.
  4. Footnote Boindja ta Mat 27, 15-23; Malako 15, 6-14; Luk 23, 13-23; Yoane 18, 38-40; 19, 12-15.
  5. Footnote Na ngulu e kombe e nde: mondumba mokabalame ta Bibilia, kombe ekabwane oko na moswa yu. Momɛsɛno momina midii monɛnɛ ta Bikɔmeli (boindja ta 4:10) ko ekainedje seko Yesu oyona osisoa ta bogwa.
  6. Footnote Boɛngɛ Luka 24, 26-27.
  7. Footnote Ta molɔngɔ mo 22-23, boindja Dit 18, 15,18,19.
  8. Footnote Mba 22, 18.

Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.