Miwera
BIKƆMELI BI BA PƆSOLU 1
Ndikano e Mwembo Mosɛnɔke ta dii bapɔsɔlu
Teopile,
Ta buku e mbi e boso1 natubana mɛko misusu mikɔkɔ Yesu ko mileha iyo, bobanga ta mbangi mbunoko ta busa ibua boiwea iyo ta busa. Boso aiwee ta busa, apa mitindo mi nde, na ndjea e Mwembo Mosɛnɔke, ta dii ibia bahɔɔ iyo ondingo bapɔsɔlu. Na tina emina, ngɔngɔ dji bogwa bo nde, asainedja na bu na bimbete binɛnɛ bobainedja bo adaaka na bomɔ: masu tuku inɛi, abaimanea ko ababalea tina etingi na Bokumu bo Ndjakomba. Busa bomɔti boyaka iyo mia na bu, abapa motindo ibo: «Pɛpɛ boimanani ta Yelusalɛmɛ, endelo ambani eka eodikanani na Sesa, ikabo idia diotɔndeakani mbi2. Modjɔ mo Yoane abatisa na madiba, endelo ino, ngɔngɔ dji masu makɛkɛ, odadeani babatisamake na Mwembo Mosɛnɔke3.»
Yesu aiwei ta busa
Iboa ibia baputoanaka mbuti na Yesu bamowadja bo: «Kumu, ta ehole iye osɔmbedjadea bokondji bo Isalɛlɛ4?»
Yesu abasombedja bo: «Ta modjɔ moindji ehole kaoko busa eindjitini ino, modjɔ mo Sesa aebɔngedja na ndenge ekapale iyo mɛnɛ5. Ekahia obolodjadeani ngulu emɔti, ehole etitadea Mwembo Mosɛnɔke ta dii ino. Iboa odaadeani ba temo ba mbi ta Yelusalɛmɛ, ta Yudhea itombo ko na Samalia, ko mbunoko ta suka e ngondo6.» Ngɔngɔ dji mɛko imia, Yesu aiwea ta busa ta ehole emina ibo basusu bamoindjaka ko itute dimɔti dimodipa ta miso ma bobo7. Iyana adaaka oko bakokoledja ta busa ta polo eiweaka Yesu, na mbala emɔti baami babae balwali bisendja bipu8 baema mbuti na bu ko babala na bu bo: «Baami ba Galileya, odikini iyana ko oindjakadeani o diko tina nda? Yesu iyona, osaiwea ta busa, asɔmbɔbi oko mondumba momɔti mosa moɛnɛ ino akɛkɛdea akɛe.»
Moto osulungana Yudhasi
Iboa batingami basɔmbɔ ta Yelusalɛmɛ ta ngomba e mele mi Olive. Ngomba emina edii mbuti na ngando enɛnɛ, bokimana ekenge e ngonga ta bodala9. Ehole eimea bo ta Yelusalɛmɛ, baiwea ta ekenge e ndako iyena edaka ibo mandɛli mandɛli ta ekpalaka o diko. Edaka Petelo10, Yoane, Djake na Andele, Pilipo na Tomasi, Batelemi na Matayo, Djake mwana o Alipe, Simona Djeloti11 ko Yudhasi mwana moomi o Djake. Ibo basusu baputoanaka engi ndelo bɛngi baangɔne, na bali, na Malia nange Yesu, ko na baangi Yesu ba baami.
Busa bomɔti bo masu mamina imia, motswiya mo badhimi baputoana mokimanaka mokama na tuku djibae. Petelo aema ta ndanda e bobo ko abala na bu bo: «Baangi mbi, eka ebala Mwembo Mosɛnɔke ta Makomi etungi ekokedjame: abala na ndjea e Dhapiti, ko ta tina e Yudhasi12, iyona oimei modaledji o bato ibia bapea Yesu. Yudhasi adaaka omɔti ta tei e biso ko abolodja mo nde mosala ta elomu e biso. Na palanga dji moputea bo ta bobe bonɛnɛ bo nde, asasombea gbie emɔti; ko akwa boso na molo, ko mokuku mo nde mobatoa ndanda ko misɔpɔ mi nde milusoa. Bato basusu ba Yelusalɛmɛ baoka modjɔ momina, na tina emina babea gbie emina na monɔkɔ mo bobo mo ngando, “Hakelɛdama”, etingodji bo “gbie e makiya13”. Enakoboa, indja eka edii ekomamake ta buku e Ndjembo:
“Kina bo ndako ende edike ngasa,
ko pɛpɛ nongo omɔti adae pɛpɛ bodaa iyana.”
Ko ekomama naikina bo:
“Kina bo okina moto atombe mosala mo nde14.”
Na tina emina etungi na moto omɔti bodoa aputoana na su bɛngi abale tati e bosisoa ta bogwa bo Kumu Yesu. Moto omina atungi adae ta tei e ibia badalaka na su ndelo esusu edalaka iso na Kumu Yesu ta bikomi, donga ehole emobatisa Yoane mbunoko busa ibua boiwea iyo bɛngi akɛe ta busa15.»
Iboa bahɔɔ bato babae: Yosepu, abeamaka Balasabasi, adjebanaka pongono Yusitusi, ko na Matsiasi Ngɔngɔ djimina ibo basusu baso baangɔnɔ bo: «Kumu, wɛ moto okadjebe milema mi bato basusu, loinedja moto ohɔi wɛ ta tei e bato ibibi babae tina e botomba mosala mo mopɔsɔlu, ta polo e Yudhasi mokini iyo tina e bokɛ ta dɔɔngɔ dihɔkɔbi iyo.» Iboa baboma djeke ko djonga ekwa ta dii Matsiasi, iyona oisama ta liputo di bapɔsɔlu doomi na omɔti.
Source notes (15)
- Footnote Boindja Luka 1, 1-4; buku e Bikɔmeli edii ekenge ekina e bwendi bopele bo Luka.
- Footnote Ayakaka mia na bu: ta mohombedja mokina adaaka na bu. Ta mobalo imua mo Yesu, boindja Luka 24, 49.
- Footnote Yoane, epalakadea bobala Yoane Mobatisi. Boindja Mat 3, 11; Malako 11:8; Luka 3, 16; Yoane 1, 33.
- Footnote Boɛngɛ Ams 9, 11-12; Luka 19; 11.
- Footnote Boɛngɛ Malako 13, 32.
- Footnote Boɛngɛ ta Mat 28, 19; Malako 16, 15; Luka 24, 47-48.
- Footnote Boɛngɛ ta Malako 16, 19; Luka 24, 50-51.
- Footnote Boɛngɛ Luka 24, 4.
- Footnote Boindja ta Malako 11, 1 ko na nase.
- Footnote Petelo… Djake: boɛngɛ Mat 10, 2-4; Malako 3, 16-19; Luka 6, 14-16.
- Footnote Boindja ta Mat 10, 4 ko na nase; Mal 3.18; Luk 6, 15.
- Footnote Boɛngɛ ta Ndjem 41, 10.
- Footnote Ta molɔngɔ mo 18-19, boindja Mat 27, 3-8.
- Footnote Ndjem 69, 26; 109, 8.
- Footnote Esika e mobatisa Yoane: ta mohombe mokina esika ebatisaka Yoane. Boindja ta Mat 3:16; Malako 1, 9; Luka 3, 21. Bɛngi akɛe ta busa: boindja 1, 9 ko na nase.
Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.