Skip to content
BibleKenya

Bondjale

MALAKO 16

Bopusoa bo Yesu

(Endja pongono ta Mat 28, 1-8; Luk 24, 1-12; Yoa 20, 1-10)

Ehole enɔkɔ busa bo sabata, Malia Magadala, Malia nange e Djake, ko Salome basombaka misoloa miso e itindi, bɛngi bakasopea mokuku mo Yesu. Ta ehuma mɛnɛ e busa bo pɔsɛ, bakɛkɛ ta ikila ehole ekime moi. Badaka basabalea: «Walodongedjake ibanga ta ipose i ikila nda?» Yana angɔdjɔkɔ bo miso, baenɛkɛ ibanga igbɔgbɔ idaka ihilingodjamake. Bakweaka ta ikila, baenɛkɛ mwenga momi, alwaka esendja epu, adi ta ebɔ e bami; ko babangaka mɛnɛ. Mwenga omina abalaka na bu: «Pɛ bobangani; wahombakani Yesu o Nasaleta, iyona obakaka bo ta ekulusu? Asapusoi ta bogwa, aditi iya. Endjani polo emosambeaka bo iye. Endolo kɛni atɔndeani batingami ba nde ko na Piɛlɛ pongono; “Boo ambakani oho ta ibonga i Galilea: oho wamoenɛkɛni, elenge abalaka yo na nu1”.» Okobea bali badongaka ta ikila i Yesu, bapotaka, badjoe na bokamoa. Ko baitɔndeaka nongo moto, tengasa badaka na bɔɔ.

Yesu asinedji na Malia e Magadala

(Endja pongono ta Mat 28, 9-10; Yoa 20, 11-18)

[2 Ngɔngɔ i Yesu bosapusoa ta bogwa, ehuma e busa bo pɔsɛ, asaenɛmedjaka boso na Malia e Magadala, yona obenganaka yo miembo mibe sambo. Malia e Magadala ayanaka ko atɔndɔkɔ gala emina adi bia badaka na nde. Yana adakabo ta ilaka ko boyea. Endolo ehole eokaka bo mwali bobala: «Yesu adi na bomɔ, na moeni!», Baimodimeaka.

Ngɔngimina, asenɛmedjaka na bu na mondumba mokina adi batingami babae badaka bayane ta ndjea e ibonga. Bo pongono basɔmbɔkɔ ko batɔndeaka ba bina bu, endolo baibadimeaka nongo.

Na bea, Yesu asenɛmedjaka na bapɔsɔlu domi na omɔti, ehole edaka bo bayaka; abaosaka mɛnɛ na taka e bodima ko na milema mipipo mi bobo, tine boo baidimeaka bia bamoenɛkɛ ngɔngɔ i bopusoa. Ngɔngɔ abalaka na bu: «Kɛni ta ngondo esusu boleha Bwɛndi Bopele adi bato basusu3. Iyona odimabi ko adiabi inelo ahelabi; endolo o dabi pɛ bodima amoleneabi etumbo. Endjani bimbete bienɛmedjamabi adi bia badimabi: na kombe e mbi, babenganakabi miembo mibe; babalakabi kɔpi iyanie; Bapeakabi ndjɔ na mɔmɔ kaoko bomwaka moselo, mobakoetebi nongo bobe bomɔti; babakeakabi mɔmɔ adi bato ba bipeko ko bato bamina bahelabi.»

Ngɔngɔ ibobala na bu meako mia, Kumu Yesu aiweaka ta busa ko adi ta ebɔ e bami e Ndjakomba4. Batingami bakɛkɛ ta polo isusu tine boleha Bwɛndi Bopele. Kumu adaka asala na bu engbanga emɔti ko abapaka suwea e bokɔ bimbete bi bokamoa, tina e bodimedja mobalo mo nde modi soti5.]

Source notes (5)
  1. Footnote Endja pongono ta 14, 28.
  2. Footnote Milɔngɔ donga ibuwa mbunoko tuku ibae miditi ta makomi makina mayou.
  3. Footnote Endja pongono ta Bik 1, 8.
  4. Footnote Endja pongono ta Bik 1, 9-11.
  5. Footnote Kɔpi dji idii ta tei e bikondjo, iditi ta mikanda mikina.

Bondjale. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.