Skip to content
BibleKenya

Bondjale

YONA 3

Yona alehi bato ba Niniwe

Mobalo mo Yawɛ mobalaka na Yona mbala e babae: «Angɔ, kɛ ta ibonga inɛnɛ i Niniwe ko dumbea oho mibalo mi opake mbi.» Yona asumaka mobalo mo Yawɛ, angɔ ko akɛ ta ibonga i Niniwe. Enakobea Niniwe edaka ibonga inɛnɛ ta miso ma Ndjakomba, eboanaka na bokɔ masu masato bɛngi oehombee esusu. Yona abangaka mosala mo nde, adalaka busa itombo ta ibonga eni adumbee: «Ediki masu tuku inɛi, bɛngi ibonga i Niniwe i bedjame!» Bato ba ibonga i Niniwe badimaka Ndjakomba1. Batombaka meko e bokia mia ko bolwa minyuku bobanga na onɔi na bodieli, mbunoko onɔi na botakeli. Ehole eokamaka gala emina adi mokondji o Niniwe, angɔkɔ ta ngbɛndɛ e bokumu, aihwaka bisendja bi nde bi bokumu, alwaka monyuku ko asadedjaka ta mihulu2. Kumu apaka mobeko boo bananganedje gala emina ta ibonga inɛnɛ i Niniwe: «Nabokimana mibeko mi mokondji ko na basali ba gala, esiami adi bato ko bingbɛndɛ, edae banɛnɛnɛ kaoko bakɛkɛkɛ: boyaka leka losusu ko bomwaka madiba. Kina boo bato ko bingbɛndɛ balwae minyuku, baongɔne Ndjakomba na bhingi. Kina boo moto na moto akine ndjea i nde ibe ko wusuwusu edi ta mɔmɔ ma nde. Odjebi nda, ndelekina Ndjakomba aboani bohombedja malɛno ma nde ko bodongedja kɛlɛ ko bosɔmbedja malɛi ngɔngɔ boo losakagwa?»

Ehole enɛkɛ Ndjakomba midjɔ mi: ko bakinaka ndjea i bobo ibe, ahombedjaka malɛno ma nde ko aibalomea naikina etumbo elɛdjɛkɛ yo bobapa.

Source notes (2)
  1. Footnote Endja pongono ta MAT 12.41; LUK 11.30,32.
  2. Footnote Boda ta mohulu: edi embete e ilaka kaoko ndjokwa enɛnɛ, endja ta Edj 27.30.

Bondjale. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.