YOANE 19

1Na bea Pilato abalaka baimedje Yesu ko bamobome mbalake. 2Basoda bayoaka egbala endjubɛ, baebakeaka Yesu ta molo ko bamolwadjaka esendja ekpetu1. 3Babatamaka mbuti na nde ko babalaka: «Bwanda, Mokondji o bayuda!» Ko bamobomaka. 4Pilato aimaka naikina ko abalaka na bayuda: «Ambani, nadoi amoimedja sokolu, bɛngi odjebeni boo nadihiti nongo modjɔ mobe tine bolenea moto iyo etumbo e bogwa.» 5Na bea Yesu aimaka; alwaka egbala e ndjubɛ ko esendja ekpetu. Ko Pilato abalaka na bu: «Endjani moto!» 6Endolo ehole emoenɛkɛ bakumu ba banganga ba Ndjakomba ko na babanei, bagamaka: «Mobaka ta ekulusu! Mobaka ta ekulusu!» Pilato abalaka na bu: «Kɛni amobakeni no bɛnɛ ta ekulusu, tengasa mbi nadihiti modjɔ mobe mo bomolenea etumbo e bogwa.» 7Bayuda bamosɔmbedjaka: «Lodi na mobeko ko bokimana mobeko momina atungi na bogwa, tengasa asimedjaka boo adi Mwana o Ndjakomba2.» 8Ehole eokaka Pilato mibalo mimina, aimeaka naikina na bɔɔ. 9Akweaka ta ndako ko ahɔdjɔkɔ Yesu: «Odi oekomi nda?» Endolo Yesu aimosɔmbedjaka. 10Na bea Pilato abalaka na nde: «Oloni bosɔmbedjani? Otadjebaka mbi nadi na kpatsi e botingoa ko pongono ebobakedja ta ekulusu?» 11Yesu amosɔmbedjaka: «Akɔki wɛ da na kpatsi diko i mbi emitida yena epamaka na wɛ donga o diko. Na tina emina, moto yona okabini adi wɛ adi na lindo bonɔ wɛ.» 12Oko ta ehole emina, Pilato ahombaka enɔi e botingoa Yesu. Endolo bayuda bagamaka: «Okatingoa momi iyo, oditi mwange e Sedjale! Moto yona wasatukoaka mokondji, adi moloni o Sedjale!» 13Ngɔngɔ i Pilato boka mibalo mimina, aimedjaka Yesu sokolu; adaa o diko ta polo e esambi ekabebo «Gabata» ta monɔkɔ mo baebele3. 14Edaka busa bo mosalingo mo tɛkɛ e Pasika, ta ngonga e midi4. Pilato abalaka na bayuda: «Endjani mokondji o bino!» 15Endolo bagamaka: «Agwɛ! Agwɛ! Mobaka ta ekulusu!» Pilato abalaka na bu: «Wapalakani nabake kumu o bino ta ekulusu?» Bakondji ba banganga ba Ndjakomba basɔmbedjaka: «Loditi na kumu okina oko Sedjale.» 16Na bea Pilato abapaka Yesu, bɛngi bamobake ta ekulusu.

Yesu abakami ta ekulusu

(Endja pongono ta Mat 27, 32-44; Mlk 15, 21-32; Luk 23, 26-43)

Na bea bakɛkɛ na Yesu. 17Yesu atombaka ekulusu e nde yo mɛnɛ, aimaka ta ngando enɛnɛ ta polo ebeamaka «Egɔgɔlɔ e molo» ebeamaka «Gologota» ta monɔkɔ mo baebele5. 18Edaka oho polo ebakaka ba soda Yesu ta ekulusu. Oko ta ehole emina, babakaka bami bakina babae ta ekulusu, omɔti ta ebɔ e bami okina ta ebɔ e bali Yesu adaka ndanda e bobo. 19Pilato atombaka moibaya o ikomi ko aibakaka ta diko i ekulusu. Bakomaka ta ibaya imina: «Yesu o Nasaleta, mokondji o bayuda.» 20Bayuda banɛnɛ balangaka ikomi imina, tengasa polo ebakabo Yesu ta ekulusu edaka mbuti na ngando enɛnɛ. Ikomi imina ikomama na monɔkɔ mo baebele, na latɛ ko na gɛlɛki. 21Na bea bakondji ba banganga ba bayuda babalaka na Pilato: «Pɛ bokoma ikomi di “kumu o bayuda,” endolo obwani bokoma: “Moto yona abalaka, adi kumu o bayuda.”» 22Pilato asombedjaka: «Eka ekomi mbi, ediki oko bea.»

23Ngɔngɔ i basoda bobaka Yesu ta ekulusu, batombaka bisendja bi nde ko babikabanaka mabondo manɛi, omɔti6 na omɔti na i nde ibondo. Batombaka pongono kasaka e nde, yena eda bo pɛ botonga, donga o diko mbunoko nase. 24Basoda basabaleanaka: «Lotaekabanaka, bopele lobome djonga tine bodjeba moto waetombake!» Ekɔmɔkɔ bea bɛngi ikomi ikokedjame: «Basakabaneabi bisendja bi mbi ko babomabi djonga tine bisendja7 bi mbi.» Endja eka ekɔkɔ basoda.

25Mbuti na ekulusu e Yesu edaka nange e nde, ngɛnɛ mwali o nange nde, Malia mwali o Kelopasi ko Malia o Magadala. 26Ehole enɛkɛ Yesu nange e nde aemi mbuti na motingami opalaka yo; abalaka na nange e nde: «Mwali, endja mwana o wɛ momi!» 27Ngɔngɔ abalaka na motingami: «Endja nange e wɛ.» Oko ta ehole emina, motingami omina amotombaka adi yo.

Bogwa bo Yesu

(Endja pongono ta Mat 27, 45-56; Mlk 15, 33-46; Luk 23, 44-49)

28Ngɔngɔ imina, elenge Yesu adjebaka boo misusu midaka misiake, abalaka tine bokokedjama bo ikomi: «Naoki posa e madiba8!» 29Edaka ena na biseli bilumake na mana ma vino e ngayi. Basoda babokeaka imbusu ta mana ma vino e ngayi9, baenangaka na etape e mole mokabebo isɔpi, bamobateaka ta monɔkɔ mo Yesu. 30Yesu atombaka mana ma vino e ngayi emina, ngɔngɔ abalaka: «Misusu mikoki!» Na bea, asuneaka molo ko molema motsweaka.

Mosoda alusa mopandje mo Yesu

31Elenge edaka busa bo mosalingo mo busa bo sabata, na bonɔ mɛnɛ sabata emina edaka isu inɛnɛ, bakondji ba bayuda baipalaka mikuku midike mibaki ta ekulusu. Na bea bahɔdjɔkɔ Pilato babuke mako ma bato ibabakama ta ekulusu10 ko batitedje mikuku mimina. 32Basoda baduaka bobuka mako ma moto o boso obakamaka engbanga na Yesu ta ekulusu, na yona o babae. 33Ehole eimeabo adi Yesu, bamoenɛ agwaka ehele; na tina emina baimobukaka mako. 34Endolo omɔti o basoda amolusaka mopandje na ikɔngɔ i nde, ko makia na madiba maimaka. 35Moto oenɛkɛ meako mimina apaka tati ko tati e nde idi soti. Adjebaka boo abalaka soti. Apaka tati emina e bɛngi ino pongono odimeni11. 36Na bea, meako mimina mimeaka bɛngi ikomi ikokedjame: «Pɛ nongo mokua mo nde mobukeabi12.» 37Ko makomi makina mabali: «Baendjabi yona olusakabo mopandje13.»

Yesu apuseami

(Endja pongono ta Mat 27, 57-61; Mlk 15, 42-47; Luk 23, 50-56)

38Ngɔngɔ imina, Esepu, moto o Alimatayo14, asɛngɛkɛ enɔi adi Pilato bɛngi boo atombe mokuku mo Yesu. Esepu adaka omɔti o batingami ba Yesu, endolo ta mbombi tine adaka na bɔɔ bo bakondji ba bayuda. Ko pilato amopaka. Na bea Esepu akɛkɛ atomba mokuku mo Yesu. 39Nikodɛmɛ, yona okɛkɛ botanea Yesu na bulu, aduaka pongono ko amolwɛkɛ munɛ mobongoanake mbuti na kilo tuku isato i mile ko na aloe15. 40Na bea batombaka mokuku mo Yesu, bamodingaka na bipasa bi bisendja bipu ko bamosopeaka misoloa mi so e itindi elenge bayuda, ta makɔkɔ ma bobo, bakakɔe ta ehole ekapusebo mikuku mi bobo. 41Enakobea edaka na gbie emɔti ta polo ebakaka bo Yesu, edaka ena na ikila iyanie ida bo pɛ bopusea moto boso. 42Elenge edaka busa bo mosalingo mo busa bo sabata e bayuda16 ko ikila idaka mbuti, basambeaka mokuku mo Yesu.