Skip to content
BibleKenya

Bodjenga

YOANI 10

Indjɛ la mobanyeli mopele ɔ bhata.

Yesu abala boo: «Edii bea, nabali na nu sooti: moto amiti ingea na ndjia ɛ edipako ɛ ikutu la bhata, endolo aihwei ta lu dɔngɔ ikina, adii moibi ko mopundji. Endolo ona oingei na ndjia ɛ edipako adii mobanei ɔ bhata. Mobanyeli ɔ ikutu amodipoi edipako, bhata baoki moholi ma nde. Abei engi bhata na kombe ɛ nde ko aimani na bu osokolu. Ehole ebaimanedjai yo, adali boso ba bobo ko bhata bamokimani tina ɛ boo badjebaka moholi ma nde. Endolo tebakimane mokɛndɛli noko osinɛɛ; bakatie ohali na nde, tina ɛ boo tebadjebe moholi ma nde.» Yesu abala na bu indjɛ dii, endolo bato baisipoa modjɔ imapalaka yo obala na bu.

Yesu, mobanyeli mopele ɔ bhata

Yesu abala koko boo: «Edii bea, nabalaka na nu sooti: nadii edipako ɛ bhata. Bii basusu ibadua boso ba mbai badii baibi ko bapundji, endolo bhata baibaoka. Mbai nadii edipako. Moto ona oingei na ndjia ɛ mbai ahelalea; ahɔni oingea ko oimana, ko adihabi mia ma nde.» Moibi akadoe oko tina ɛ oiba, oowa ko obeedja. Mbai, nadoi bɛngɛ boo bato badihe mohelo ko bamodihe na onɔ. Nadii mobanei mopele ɔ bhata. Mobanei mopele akakabe mohelo ma nde tina ɛ bhata ba nde. Moto ona okasale oko tina ɛ falanga; aditi moswa bhata. Ehole eeni yo swa adoe, abasundoli ko ati. Na bea swa abapei ko ananganedjai bwela ba bhata. Na tina hee, moto ona okasale etoko ta tina ɛ falanga aditi na okɛsɛli ba bhata. Mbai nadii mobanei ɔ bhata mopele. Nakadjebe bhata ba mbai, ko ibo bakadjebeni, oko moda mokadjebeni Tata ko mbai nakadjebe Tata. Ko nakabaka mohelo ma mbai tina ɛ bhata ba mbai. Nadii koko na bhata bakina ibadii pɛpɛ oda ba ikutu dii. Naboani koko obalondɔ; baokabi moholi ma mbai, ko baimeabi oko bwela ba bhata bomɔti na mobanyeli omɔti. Tata apalakani tina ɛ boo nakabaka mohelo ma mbai, ko namodihalea naikina. Moto omɔti atakatoa mohelo ma mbai, endolo namokabaka na opala ba mbai mɛɛnɛ. Nadii na kpati ɛ omokaba ko nadii na kpati ɛ omotomba koko. Edii elomu ɛpani Tata. Bayuda babɔtɔɔ koko diko la bibaeli bia. Bike ta ndanda ɛ bobo babalaka boo: «Adii na mwembo mobe! Adii na kpukele! Tina ɛ mohokamedjaka na nu nda?» Endolo bakina babalaka boo: «Moto oodii na mwembo mobe tabale bea. Mwembo mobe mohɔni odipoa miso ma bato bagwa miso?»

Yesu alonami

Ɛdaka edidi ɛ piɔ epipo ehole ɛsepaka bo obudjeama ba tepelo ta Yelusalɛmɛ. Yesu adaka anɔɔnɔ ta tepelo ta mbalasani ɛ Sɔlɔmɔ. Na bea Bayuda babolama mbuti na nde ko babala na nde boo: «Mbunoko ehole ndani olokinalea milema diko? Ekada boo odii Masia, bala nasu ohuu.» Yesu abasɔmbɛdja boo: «Nabala na nu ehele, endolo todhimenini. Misala imakɔkɔ mbai ta kombe ɛ Tata mapaka tati tina ɛ mbai. Endolo todhimeni, tina ɛ bo oditini bhata ba mbai. Bhata ba mbai bakaoke moholi ma mbai; nakabadjebe ko bakakimaneni. Nadii obapa mohelo ma kɔbili, babungetebi noko osinɛɛ ko pɛpɛ moto obakatoabi ta ebɔ ɛ mbai. Tata ona ɔpani bhata bia anɔi bato basusu na onɛnɛ ko moto omɔti atabakatoa ta ebɔ ɛ Tata. Mbai nɔsɔ Tata lodii omɔti.» Bayuda batuta naikina ndeke bo bamolɛ. Endolo Yesu abala na bu boo: «Naoinedjani misala mike mipele imadonga odii Tata. Mosala ndani ta misala mia imapalakano boo ɔwoenini na ndeke?» Bayuda bamosɔmbɛdja boo: «Lotapalaka laowoe na ndeke tina ɛ mosala mopele, endolo tina ɛ boo ɔsaolaka Ndjambe: odii oko moto ko opalaka ɔsaimedjae Ndjambe!» Yesu abasɔmbɛdja boo: «Ɛkomama ta mobeko ma boono boo Ndjambe abala: “Odini bandjambe.” Lotahɔnɔ odongedja midjɔ imakomama ta Makomi. Nga akababea, ba ndjambe bato ibalomea yo ebaeli ɛ nde. Ko mbai, Tata abudjeani ko alomani ta ngondo. Moda ndani mohɔnino obala boo nasaoli Ndjambe, tina ɛ boo nabali boo nadii Mwana ɔ Ndjambe? Ekadaa boo nitakɔkɔ misala ma Tata, pɛpɛ odhimeanini. Endolo ekadaa boo namikɔkɔ, omiti dhimianini, dhimani noko misala mia bɛngɛ odjebeni na osusu boo Tata ahelaka ta tei ɛ mbai ko mbai ta tei ɛ Tata.» Bahɔmba naikina boo bamopee, endolo asɔmɔnɔɔ na bu. Yesu akɛɛ naikina ta dɔngɔ la dua ɛ Yolodani, ta esika ebanga Yoani oina bato boso mɛɛnɛ, ko anɛngɛdja ena. Bato bike badoa odii yo. Babalaka boo: «Yoani aikɔ noko embete emɔti ɛ okamoa, endolo misusu imabala yo tina ɛ moto hoo midii sooti.» Na bea, bato bike badhima Yesu.

Bodjenga. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.