Biblica® नेपाली समकालीन सर्वसुलभ संस्करण
भजनसंग्रह 24
दावीदको भजन।
पृथ्वी र यसमा भएका सबै थोक,
यो संसार र यसमा बास गर्ने सबै प्राणीहरू याहवेहकै हुन्;
किनकि उहाँले पृथ्वीलाई समुद्रमाथि बसाल्नुभयो,
र पानीमाथि स्थापित गर्नुभयो।
याहवेहको डाँडामा को उक्लिन सक्ला?
उहाँको पवित्रस्थानमा को उभिन सक्ला?
त्यही नै, जसको हात निर्दोष छ, र जसको हृदय शुद्ध छ;
जसले मूर्तिमाथि भरोसा राख्दैन,
अथवा जसले झूटो ईश्वरको नाममा शपथ खाँदैन।
तिनीहरूले याहवेहबाट आशिष् पाउनेछन्,
र मुक्तिदाता परमेश्वरले तिनीहरूलाई धर्मी ठहराउनुहुनेछ।
उहाँलाई खोज्ने पुस्ताका मानिसहरू यस्तै हुन्छन्,
जसले तपाईंको दर्शन खोज्दछन्, हे याकोबका परमेश्वर। सेला
हे मूलढोकाहरू हो, आफ्ना शिर उच्च पार;
हे सनातनका द्वारहरू हो, आफ्ना शिर उठाओ,
ताकि महिमाका महाराजा प्रवेश गरून्।
यी महिमाका राजा को हुनुहुन्छ?
याहवेह, जो बलियो र शक्तिशाली हुनुहुन्छ,
याहवेह, जो लडाइँमा पराक्रमी हुनुहुन्छ।
हे मूलढोकाहरू हो, आफ्ना शिर उच्च पार;
हे सनातनका ढोकाहरू हो, आफ्ना शिर उठाओ;
ताकि महिमाका महाराजा प्रवेश गरून्।
महिमाका यी महाराजाचाहिँ को हुनुहुन्छ?
सेनाहरूका याहवेह—
उहाँ नै महिमाका महाराजा हुनुहुन्छ। सेला
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.