Biblica® नेपाली समकालीन सर्वसुलभ संस्करण
होशे 5
इस्राएलको विरुद्धमा न्याय
“हे पुजारीहरू हो, यो कुरा सुन!
हे इस्राएलीहरू हो, ध्यान दिएर सुन!
हे राजकीय घराना हो, ध्यानसित सुन!
यो न्याय तिमीहरूको विरुद्धमा छ:
तिमीहरू मिस्पामा पासोझैँ बनेका छौ,
र तिमीहरू तबोरमा फिँजाइराखेका जाल भएका छौ।
विद्रोहीहरू हत्याको गहिराइमा फसेका छन्;
म तिनीहरू सबैलाई अनुशासित तुल्याउनेछु।
म एफ्राइमको बारेमा सबै कुरा जान्दछु;
इस्राएल मदेखि लुकेको छैनँ।
एफ्राइम, तँ अब वेश्यावृत्तिमा लागेको छस्;
इस्राएल भ्रष्ट भएको छ।
“तिनीहरूका कामहरूले तिनीहरूलाई
आफ्ना परमेश्वरतर्फ फर्कन दिँदैन।
तिनीहरूका हृदयमा वेश्यावृत्तिको आत्मा छ;
तिनीहरूले याहवेहलाई मान्यता दिँदैनन्।
इस्राएलको अहङ्कारले तिनीहरूको विरुद्धमा साक्षी दिन्छ;
इस्राएल र एफ्राइम पनि आ-आफ्नो पापमा ठक्कर खानेछन्;
तिनीहरूसँग यहूदाले पनि ठक्कर खानेछ।
जब तिनीहरू याहवेहलाई खोज्न
आफ्ना बगालहरू र बथानहरूसँग जान्छन्,
तब तिनीहरूले उहाँलाई भेट्टाउनेछैनन्;
उहाँले आफैँलाई तिनीहरूदेखि अलग गर्नुभएको छ।
तिनीहरू याहवेहप्रति विश्वासघाती भएका छन्;
तिनीहरूले अवैध छोराछोरीहरू जन्माउँछन्।
जब तिनीहरूले नयाँ औँसीका चाडपर्वहरू मनाउँछन्,
तब ती चाडपर्वहरूले तिनीहरूका खेतहरू निल्नेछन्।
“गेबामा तुरही फुक,
रामामा बिगुल फुक।
बेथ-आवेनमा युद्धको ध्वनि उठाओ;
हे बेन्यामीन, अगुवाइ गर।
न्यायको दिनमा
एफ्राइमलाई उजाड पारिनेछ।
इस्राएलका कुलहरूका बीचमा
यी कुराहरू निश्चित छन्, म घोषणा गर्दछु।
यहूदाका अगुवाहरू
सिमानाका ढुङ्गाहरू हटाउनेहरूजस्ता छन्।
म तिनीहरूमाथि वर्षाको बाढीजस्तै
मेरो क्रोध खन्याउनेछु।
एफ्राइम थिचोमिचोमा परेको छ,
न्यायमा त्यो कुल्चीमिल्ची भएको छ;
त्यसले मूर्तिको पछि हिँड्नलाई अठोट गरेको छ।
म एफ्राइमको निम्ति कपडा खाने किराजस्तै छु,
र यहूदाका मानिसहरूका निम्ति म ढुसीजस्तै छु।
“जब एफ्राइमले आफ्नो रोग देख्यो
र यहूदाले आफ्नो चोट देख्यो,
तब एफ्राइम अश्शूरतिर फर्क्यो,
र महान् राजाकहाँ सहायताको निम्ति मानिस पठायो।
तर त्यसले तँलाई निको पार्न सक्दैन;
त्यसले तेरा घाउ निको पार्न सक्दैन।
किनकि म एफ्राइमको निम्ति एउटा सिंहजस्तै
र यहूदाको निम्ति एउटा ठूलो सिंहजस्तै हुनेछु।
म तिनीहरूलाई टुक्रा-टुक्रा पार्नेछु र गइहाल्नेछु;
म तिनीहरूलाई उठाएर लैजानेछु, र तिनीहरूलाई छुटाउने कोही पनि हुनेछैन।
जबसम्म तिनीहरूले आफ्नो दोष स्वीकार गर्दैनन्,
र तिनीहरूले मेरो अनुहार खोज्दैनन्,
तबसम्म म फर्केर आफ्नै ठाउँमा रहनेछु;
अनि आफ्नो कष्टमा
तिनीहरूले मलाई यत्नपूर्वक खोज्नेछन्।”
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.