Biblica® नेपाली समकालीन सर्वसुलभ संस्करण
इजकिएल 19
इस्राएलका राजकुमारहरूका निम्ति विलाप
“इस्राएलका राजकुमारहरूका निम्ति एउटा विलापको गीत सुना, र भन्:
“सिंहहरूमध्ये तेरी आमा
कस्ती सिंहिनी थिई!
जवान सिंहहरूको बीचमा बसेर
त्यसले आफ्ना डमरुहरूलाई हुर्काई।
त्यसले आफ्ना डमरुहरूमध्ये एउटालाई हुर्काई;
अनि त्यो एउटा बलियो सिंह भयो।
त्यसले शिकारलाई फहराउन जान्यो,
र त्यसले मानिसहरूलाई खान थाल्यो।
जाति-जातिहरूले त्यसको बारेमा सुने,
र त्यो तिनीहरूको खाडलको पासोमा पर्यो।
तिनीहरूले त्यसलाई अङ्कुसेले तानेर
इजिप्ट देशमा लगे।
“ ‘जब त्यस सिंहिनीले आफ्नो आशा पूरा नभएको,
आफ्नो अपेक्षा टुटेको देखी;
तब त्यसले आफ्ना डमरुहरूमध्ये अर्को एउटालाई लिई
र त्यसलाई एउटा बलियो सिंह बनाई।
त्यो सिंहहरूको बीचमा शिकारको खोजीमा यताउता हिँड्डुल गर्न थाल्यो;
किनकि अब त्यो एउटा बलवान् सिंह भएको थियो।
त्यसले शिकारलाई फहराउन जान्यो,
र त्यो मानिस खाने भयो।
त्यसले तिनीहरूका बलियो किल्लाहरू भत्काइदियो,
र तिनीहरूका सहरहरू ध्वस्त पारिदियो।
देश र त्यसमा भएका सबै जना
त्यसको गर्जनद्वारा त्रसित भए।
तब त्यसको चारैतिर भएका
जाति-जातिहरू त्यसको विरुद्धमा आए।
तिनीहरूले त्यसको विरुद्धमा तिनीहरूका जाल फिँजाए,
र त्यो तिनीहरूको खाडलको पासोमा फस्यो।
तिनीहरूले त्यसलाई अङ्कुसेले तानेर खोरमा हाले
र त्यसलाई बेबिलोनका राजाकहाँ ल्याए।
तिनीहरूले त्यसलाई थुनेर राखे।
त्यसैले त्यसको गर्जन इस्राएलका
पर्वतहरूमा फेरि सुनिएन।
“ ‘पानीको छेउमा रोपिएको तेरो दाखबारीको
दाखको बोटजस्तै तेरी आमा थिई;
प्रशस्त पानी भएको कारण
त्यो फलदायक र हाँगाहरूले भरिएको थियो।
त्यसका हाँगाहरू बलिया थिए,
र शासकको राजदण्डको निम्ति योग्यका थिए।
बाक्ला पातहरूमाथि
त्यो अग्लो बोट भएर बढ्यो;
अनि त्यसका हाँगाहरू धेरै थिए,
र त्यो उचाइमा अग्लो देखिन्थ्यो।
तर क्रोधमा त्यो उखेलियो,
र जमिनमा त्यो फ्याँकियो।
अनि पूर्वीय बतासले त्यसलाई सुकाइदियो,
र त्यसका फलहरू सबै झारिदियो;
त्यसका बलिया हाँगाहरू सुकिहाले,
र आगोले ती भस्म पार्यो।
अब त त्यो सुक्खा र पानी नभएको ठाउँ,
मरुभूमिमा रोपिएको छ।
त्यसका मुख्य हाँगाहरूमध्ये एउटाबाट आगो फैलियो
र त्यसका फलहरूलाई भस्म पारिदियो।
शासकको राजदण्डको निम्ति योग्य,
कुनै पनि बलियो हाँगा त्यसमा छोडिएन।’
यो एक विलापको गीत हो, र यो विलापको गीतको रूपमा प्रयोग हुनुपर्छ।”
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.