Biblica® Open Nepali Contemporary Version
यशैया 4
त्यस दिन सात जना स्त्रीहरूले
एक जना मानिसलाई समात्नेछन्,
र यसो भन्नेछन्, “हामी आफ्नै भोजन खानेछौँ;
अनि आफ्ना लुगाको प्रबन्ध आफैँ गर्नेछौँ;
तपाईं हाम्रो पति हुनुहोस्।
हाम्रो अपमान तपाईंले हटाइदिनुहोस्!”
याहवेहको हाँगा
त्यस दिन याहवेहको हाँगा सुन्दर र महिमित हुनेछ; अनि जमिनको फल इस्राएलमा बाँचेकाहरूका निम्ति गर्व र महिमा हुनेछ। सियोनमा छोडिएका यरूशलेममा रहनेहरू सबै, जो यरूशलेममा बस्नेहरूको गन्तीमा आएका छन्, तिनीहरू पवित्र भनिनेछन्। प्रभुले सियोनका स्त्रीहरूको मैला धोइदिनुहुनेछ; उहाँले न्यायको आत्मा र आगोको आत्माले यरूशलेमबाट रगतका दागहरू सफा गरिदिनुहुनेछ। त्यसपछि याहवेहले सियोन पर्वतमाथि र त्यहाँ भेला हुने जातिमाथि दिनमा धुवाँको बादल अनि राति बल्दो आगोको ज्योति सृष्टि गरिदिनुहुनेछ; त्यस सम्पूर्ण महिमामाथि एउटा मण्डप हुनेछ। त्यो दिनको गर्मीबाट बच्ने आश्रय र छाया; अनि आँधी र वर्षाबाट बचाउने शरणस्थान र लुक्ने ठाउँ हुनेछ।
Biblica® Open Nepali Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.