Akakenga

2 Kitabo Cha

Akakenga

Ulongolelo

Kitabo chenje cha ilongoche bhibhakemitwa Akakenga ndi kitabo chikichimulila ghighakengima kipinde chela Akaichilahele pibhakijhingilila kilambo chuku Kaanane nu kutola kilambo chenie kubhehe chabhe. Kikibha kipinde cha malagho chikilongohina na mang'ahe nu kung'ahichwa, palonge ngibhaghombwika. Kipinde chenie Akaichilahele bhakayobhalila kuijhinamila ichapanga na peniya Chapanga ngabhahagwila bhando bha ilambo henge bhaike kwang'aha. Peniya bhando ngabhannelila nu kummujhii Chapanga na jwenio Chapanga ngabhahagwila ilongoche ikemitwa, “Akakenga,” kupala kwalongocha na kwabhoha bhando muubhanda na mu mang'ahe.

Abhii jhe mundo jwaimanye achwa, kubhehe ghane jwakajhandike kitabo chenje cha Akakenga. Bhando bhamahele bhihambuka kubhehe pange jwakajhandike kitabo chenje akibha nnondole jwa Chapanga Chamwele, nambo ihoto kubhehe chakaka achwa kikajhandikwe kipinde chenie, Akaichilahele pibhakibha na munahota nkolongwa gwabhe, nhwalo kitabo chenje kilingukii unyuma nu kulonge kubhehe kipinde cha Akakenga, Akaichilahele bhakibha jhe na munahota nkolongwa, mu chula jha 17:6 na 18:1 na 19:1 ade mu chula jha 21:25. Kipinde chenie Akaichilahele ndi pibhabhokita ku Michile, ikibha mu chaka cha 1400 kabula jhukubhelukwa Yecho Kilichitu. Dolekeya mu longolelo gwa kitabo cha Kubhoka, na pange iwechekana indondo ya Akakenga ikatendike mu yaka ya 1300 ade 1050, kabula jhukubhelukwa Yecho Kilichitu, kipinde chenie Chaule ndi pajhemikwa kubhehe munahota nkolongwa jwa Akaichilahele.

Ghughabhii mukitabo

Ngondo jha mwicho pakate jha Akaichilahela na Akakaane pala pajhomwika Yochuwa. Helahela ichimulila kipinde Chapanga pabhahagwila ilongoche bhibhalongwicha Akaichilahele na kwakombola, mu chula jha 1 ade 3:6.

Kabhele Chapanga ahaghuu Akakenga bhange kwatangatila Akaichilahele, mu chula jha 3:7 ade 16:31.

Kupeta kwa gheniya, Akaichilahele bhinneka Chapanga nu kuijhinamila ichapanga henge, mu chula jha 17 ade 21.