Kombokela

Kitabo chikijhandikwe na Mucha chikikemwa

Kombokela lya malaghalikilo

Ulongolelo

Kitabo cha Kombokela ndi mabhujhilo gha malaghalikilo ghighalongilwa kuhumii nkate jha itabo nhwano ya malaghalikilo yukutumbula ya lilaghano ya Makacho. Liina lya Kiebulaniya lya kitabo chenje lina mana jhenje, “Malobhe.” Inhobholeka kubhehe Mucha ndi jwakajhandike kitabo chenje nambo tu chehemo njokombe jhu kujhomolela jhichimulila kujhomwoka kwake. Kitabo chenje kitumbula kwa malobhe ghighalongela kubhehe, “Ghanga ndi malobhe gha Mucha kwa Akaichilahele.” Putulonge kubhehe Mucha ndi jwakajhandike kitabo chenje cha Kombokela ghilangii mala twe kuhumii mu Lilaghano liyono, nnandanikilo kuhumii mu kitabo cha Akatenga muchula jha 3:22-23, Petile palongila kuhumii mu kitabo cha Kombokela mu chehemo jha chula jha 18:15-18 nu kulonge kubhehe ghanga ndi ghakibha malobhe gha Mucha. Ihoto kubhehe Mucha ndi jwakajhandike kitabo chenje cha Kombokela pamonga na kitabo Chukutumbula na chu Kubhoka na kitabo cha Akalawe na kitabo cha Kibhalango, pange muchaka cha 1300 ade 1400, kabula jhukubhelukwa Yecho Kilichitu.

Kitabo cha Kombokela kijhandikwe ngita malaghano pakate jha munahota nkolongwa na unahota nkolongwa ghonge ghubhii pahe jha kindendeke chake ngita chitendika makacho. Ndi kujheketelana pakate jha Chapanga na bhando bhuku Ichilahele. Chapanga akajheketile kwape mota bhando anda bhene nabhakengama nu kujhokanikiya malaghalikilo ghake. Akaichilahele ngabhakana kukamula mihilo jha Chapanga ngibhachwapwile. Kilebhe chenio lya kukana kukengama nu kuchwapulwa ndi kilebhe kikolongwa mu kitabo chenje, nambo mu chula jha 27 na muchula jha 28, ichokolekeya uchakaka ghongo ilombona na mota yakanjika na likoto ngaipitii kuhumii mujhokanikilo amu kukana kujhokanikiya kwa bhando bhuku Ichilahele.

Makabila ghange ghuku Ichilahele ghakajhemite mwitombe mwiye na mwiye, ngabhanonwiya malobhe gha mota yene na likoto lyenie, ngita ndela jhukulangii lilaghano bhalipokile.

Ghughabhii mukitabo

Mucha ikombocha ghighapitila umwanja gwa bhando bhuku Ichilahele pibhakibha kunjenga, mu chula jha 1 ade 3.

Mucha ichimulila malaghalikilo gha lilaghano pakate jha Chapanga na bhando bhuku Ichilahele, mu chula jha 4 ade 26.

Bhando bhuku Ichilahele bhilonge mota na likoto kwa kunonoha lilobhe kulangii kubhehe lilaghano bhilipokile, mu chula jha 27 ade 30.

Mucha ilonge malobhe ghu kujhomolela kwa Yochuwa na kwa likabila lyake, kabula jhu kujhomwoka kwake, mu chula jha 31 ade 34.