1Samwele

Kitabo Chu Kutumbula Cha

Chamwele

Ulongolelo

Kitabo chukutumbula cha Chamwele na kitabo chuubhele cha Chamwele, makacho kikibha kitabo chimo kikolongwa, chikimanyikina ngita, “Kitabo cha Chamwele.” Kitabo chenio ngakibhaghinwa nukubhe itabo ibhele mulilaghano lya Makacho, “Seputuajente.” Lende ndi likibha litafuchile lyukutumbula lya lilaghano lya Makacho, mukilonge cha Kiyunane. Liina lya tafuchile jhenio mana ghake kubhehe kikajhandikwe na bhando makome chaba bhibhachomite Kiyahude. Mu kuhumbula mukilonge cha Kigilike, kitabo chukutumbula na chuubhele ya Chamwele, ikemitwa unahota nkolongwa ghu kutumbula na unahota nkolongwa ghu ubhele, mulitafuchile lya Kilatine lilikengime pilipeta lyenio, itabo yenio ngaibadilichwa nu kukemwa unahota nkolongwa ghukutumbula na unahota nkolongwa ghuubhele. Yene ndi itabo imanyikana kipinde chenje anda unahota nkolongwa ghu Kutumbula na unahota nkolongwa gwa ubhele mu tafuchile jhenio ikemitwa unahota nkolongwa utato nu unahota nkolongwa gwa ncheche. Kitabo chu Kutumbula cha Chamwele na kitabo chu Ubhele cha Chamwele ghichimulila malobhe gha ughome gwa nnondole Chamwele na munahota nkolongwa Sauli na munahota nkolongwa Daude. Chamwele akibha kilongoche jhukujhomolela kipiende kilambo chuku Ichilahele pikijhangingina kuhumi kulongochwa na Nkenga na kutumbu kulongochwa na munahota nkolongwa. Chamwele jwenio ndi jwabhamiminila mahuta Sauli na Daude kubhehe Akanahota akolongwa bhibhatumbwila kulongocha ku Ichilahele. Itabo ya Chamwele jhukutumbula na Chamwele jhuubhele ichimulila chikipitila ya kilambo chuku Ichilahele mu kipinde chenio.

Abhii jhe jwaimanye ghane jwajhandike itabo yenio, kitabo chukutumbula cha Chamwele nu kitabo chubhele cha Chamwele. Jwajhandika akilongii jhe jwenie muitabo yenio, pange akibha ghome mukipinde choha chuulongoche gwa munahota nkolongwa Daude na pange akabhi ghome ata bada jhuulongoche gwenio, na pange hele akibha nuuhotolo ghukulola nukuchoma baluwa henge jhichimulile ughome gwa Sauli na Chamwele. Iwechekana akahotwi kuchoma baluwa henge ichimulila ughome gwa Sauli na Chamwele. Kunhwalo gwangamanyika kwa mundo amu bhando bhibhajhandike itabo henge, hele imanyikana jhe itabo henge ikajhandikwe ligha.

Ghughabhii mukitabo

Kubhelukwa nu kukemwa kwa nnondole Chamwele mu utumiche gwa Bhambo Chapanga, mu chula jha 1 ade 3

Akafilichite pibhatoila lichanduko lya lilaghano lya Chapanga kubhoke kwa Akaichilahele, na namuna chililetita uhangabhano gwa miche jha Akafilichite na pilikibha mu miche jhenio mu chula jha 4 ade 7.

Akaichilahele pibhapaila bhabhehe na munahota nkolongwa, hele namuna Chamwele pampakiya Sauli mahuta kupala abhehe munahota nkolongwa jhukutumbula jhuku Ichilahele na namuna Bhambo Chapanga pankanita Sauli, mu chula jha 8 ade 15.

Chamwele pampakiya mahuta Daude kubhehe munahota nkolongwa jhuubhele jhuku Ichilahele na namuna Sauli pajhighita kunkoma Daude, mu chula jha 16 ade 31.