Akaepecho

Baluwa jha Pauli kwa

Akaepecho

Ulongolelo

Baluwa jha Pauli kwa bando bha ku Epecho kikajhandikwe pamonga na baluwa jha Akakolochahe muchaka cha makome chita pabhelwika njwe Yecho Kilichitu. Mundo jwajhandika amanyikina ngita Ntenga Pauli, mu chula jha 1:1. Akachomi twe bhajheketela kubhehe Pauli ndi jwajhandika baluwa kwa Akaepecho, pamonga na gheniya baluwa jhene atei jhe nyambuchilo yake jwenio ngita chateii kwa baluwa jha Akakolochahe. Kwa nhwalo ghongo, pange ipalitwa itindile kwa malongo gha bhando ghighannyeketii Kilichitu ghughabhii ku muche gwenio. Helahela Pauli ichimulila pajhandikila baluwa jhenje akibha mukipungo mu chula jha 3:1; 4:1; na 6:20. Pauli akankamwii Tikiko baluwa jhenje pakibha atyangila makunde gha bhando ghighannyeketii Kilichitu gha ku Epecho mu chula jha 6:21-22.

Epecho ukibha ndi muche nkolongwa gwa ulongoche gwa Kiloma mu Asiya Njokombe. Epecho ukamanyikine hake kwa nyumba jha chapanga jhichengwitwe mwenio jhikapihitwe palonge jha ichapanga mwikeghe jwa Kiyunane jwakemitwa Atemi mukitabo cha mahengo gha Akatenga, mu chula jha 19: 23-31. Likunde lya bhando lilinnyeketii Kilichitu lya bhando bha ku Epecho likibha na makakala hake pulitumbwila nambo paligha lijhakuhobheya makakala ghake, Ulot 2:1-7.

Munucho jha baluwa jhenje jha Akaepecho, Pauli ichimulila Chapanga chabhahagwii bhando na kwakombola kubhoka muhakaho gwabhe kwa ndela jha Yecho Kilichitu. Na alandanikiya likunde lya bhando lilinnyeketii Kilichitu na yegha, Kilichitu ndi muto, na helahela alandanikiya likunde lya bhando lilinnyeketii Kilichitu ndi nyumba, na Kilichitu ndi nchinge. Na chehemo jha ubhele jha baluwa chenje Pauli ilangii akakilichitu bhoha chiipalwa bhatame pamonga na Kilichitu mutamo gwabhe.

Ghughabhii mukitabo

Pauli itumbuu kukilongele jwenio na ajhambucha bha ku Epecho, mu chula jha 1:1-2.

Peniya ichimulila chibhajhelana pakate jha likunde lya bhando lilinnyeketii Kilichitu na Kilichitu, mu chula jha 1:3-3:21.

Pauli ijhandika kone ilangii chiipalwa kwa Nkilichitu kubhegha, mu chula jha 4:1-6:20.

Pauli akajhomolile kwa kupiya malaghilo ghake, mu chula jha 6:21-24.