UZakhariya 13

Ukuhlanjululwa Ezonweni

1“Ngalelolanga umthombo uzavulelwa indlu kaDavida labakhileyo eJerusalema, ukubahlanza izono lokungcola.

2Ngalelolanga ngizawasusa amabizo ezithombe elizweni ukuze zingakhunjulwa njalo,” kutsho uThixo uSomandla. “Ngizabasusa abaphrofethi kanye lomoya wokungcola phakathi kwelizwe. 3Nxa ezabe elokhu ekhona ophrofethayo, uyise lonina abamzalayo bazakuthi kuye, ‘Kumele ufe ngoba usukhulume amanga ngegama likaThixo.’ Uzakuthi ephrofitha abazali bakhe ngokwabo bazamgwaza.

4Ngalelolanga ngulowo lalowo umphrofethi uzaba lamanhloni ngombono wakhe wokuphrofetha. Akayikwembatha isivunulo somphrofethi esoboya ezama ukukhohlisa. 5Uzakuthi, ‘Kangisuye umphrofethi, ngingumlimi; umhlabathi uyilapho okulokuphila kwami kusukela ebutsheni bami’ 6Aluba ebuzwa kuthiwe, ‘Ngawani amanxeba la asemzimbeni wakho?’ Uzaphendula athi, ‘Ngamanxeba engawazuza endlini yabangane bami.’

Umelusi Utshayiwe, Izimvu Zahlakazwa

7Vuka, wena nkemba, vukela umelusi wami,

uvukele umuntu osekhwapheni lami!”

kutsho uThixo uSomandla.

“Tshaya umelusi,

izimvu zizahlakazeka,

njalo ngizaphendula isandla sami ngitshaye ezincinyane.

8Kulolonke ilizwe,” kutsho uThixo,

“ezimbili kwezintathu zizatshaywa zife;

kodwa ingxenye yesithathu izasala kulo.

9Le ingxenye yesithathu ngizayifaka emlilweni;

ngizabancibilikisa ngibacenge njengesiliva

ngibahlolisise njengegolide.

Bazalibiza ibizo lami,

lami ngizabaphendula;

ngizakuthi, ‘Bangabantu bami,’

labo bazakuthi, ‘UThixo unguNkulunkulu wethu.’ ”