Ingoma 8

1Aluba nje unjengomfowethu kimi,

owondliwa emunya emabeleni kamama!

Lapho-ke, nxa ngikufica phandle,

ngithi loba ngikwanga,

angabikhona ongisolayo.

2Ngabe ngiyakudonsa

ngikuse endlini kamama

yena owangikhulisayo.

Ngabe ngikupha iwayini elixutshiweyo unathe,

uluju lwamaphomegranathi ami.

3Ingalo yakhe yobunxele ngiyiqamele

kuthi ingalo yakhe yokunene ingigonile.

4Madodakazi aseJerusalema, ngiyaliqonqosela:

Lingalunyakazisi loba liluvuse uthando

luze luzifunele lona.

Abangane

5Ngubani lo oqhamukayo evela enkangala na,

eyeme isithandwa sakhe?

Umlobokazi

Ngikuvusile ngaphansi kwesihlahla se-aphula;

kulapho unyoko akumithela khona,

kulapho ahelelwa wakuzalela khona.

6Ngibeka ngibe njengesidindo enhliziyweni yakho,

njengesidindo engalweni yakho;

ngoba uthando lulamandla njengokufa,

ubukhwele balo kabuyekethisi njengengcwaba.

Luyatshisa njengomlilo obhebha kakhulu,

njengelangabi elivuthayo.

7Impophoma zamanzi ngeke zilucime uthando;

imifula ngeke ilukhukhule.

Nxa umuntu enganika

yonke inotho yomuzi wakhe

ngenxa yothando kungaba yinhlekisa.

Abangane

8Silentombazana engumnawethu,

njalo kayikaphuhli.

Sizamenzelani kambe umnawethu

mhla sekuthiwa uyacelwa?

9Uba engumduli,

sizakwakha imiphotshongo yesiliva phezu kwakhe.

Uba engumnyango,

sizamvala ngamapulanka esihlahla somsedari.

Umlobokazi

10Ngingumduli,

lamabele ami anjengemiphotshongo.

Yikho-nje emehlweni akhe

sengifana lalowo olethe ukusuthiseka.

11USolomoni wayelesivini eBhali Hamoni;

wasiqhatshisela ebalimini isivini sakhe.

Munye ngamunye kwakumele athele umthelo wezithelo zawo

ongamashekeli esiliva ayinkulungwane.

12Kodwa esami isivini ngesami ukupha santando;

amashekeli lawo ayinkulungwane ngawakho, bakithi Solomoni,

lamakhulu amabili amashekeli ngawalabo abalondoloza izithelo zawo.

Umyeni

13Wena ohlala ezivandeni labangane

bekususa isizungu,

ake ngilizwe ilizwi lakho!

Umlobokazi

14Masihambe, sithandwa sami,

woba njengembabala

kumbe njengejongosana lomziki

ezintabeni ezigcwele amakha.