AmaHubo 9

Kumqondisi wokuhlabelela. Ihlatshelwa njengengoma ethi “Ukufa kweNdodana.” Ihubo likaDavida.

1Ngizakudumisa, Oh Thixo, ngenhliziyo yami yonke;

ngizafakaza ngazozonke izimangaliso zakho.

2Ngizathokoza ngijabule ngawe,

ngizahlabelela indumiso egameni lakho,

wena oPhezukonke.

3Izitha zami ziyafulathela zibaleke;

ziyakhubeka zitshabalale phambi kwakho.

4Ngoba ulisekele ilungelo lami;

usuhlalile esihlalweni sakho sobukhosi

wahlulela kakuhle.

5Uzikhuzile izizwe,

wababhubhisa ababi;

wawesula amabizo abo

kuze kube nini lanini.

6Ukubhidlika okungapheliyo kusehlele isitha sami,

wawasiphuna amadolobho aso;

lokukhunjulwa kwaso sekuphele nya.

7UThixo uyabusa kuze kube nininini;

usesimisile isihlalo sakhe sobukhosi ukuze ahlulele.

8Uzabusa umhlaba ngokulunga

njalo uzakwahlulela abantu ngokufaneleyo.

9UThixo uyisiphephelo sabancindezelweyo,

uyinqaba ezikhathini zokuhlupheka.

10Labo abalaziyo ibizo lakho bazathemba kuwe,

ngoba wena, Thixo, kawubafulatheli abakudingayo.

11Hlabelelani indumiso kuThixo esebukhosini eZiyoni;

fakazani phakathi kwezizwe

ngalokho akwenzileyo.

12Ngoba yena ophindiselayo kulowo ochitha igazi uyakhumbula;

akakudeli ukukhala kwabahlukuluzwayo.

13Oh Thixo, ake ubone ukuthi izitha zami zingichukuluza njani!

Yiba lesihawu ungenyule emasangweni okufa,

14ukuze ngifakaze indumiso yakho

emasangweni eNdodakazi yaseZiyoni

kuthi khonale ngithokoze

ngokusindisa kwakho.

15Izizwe ziwele emgodini eziwumbileyo;

inyawo zazo zibanjwe emambuleni eziwathiyileyo.

16UThixo waziwa ngokwahlulela kwakhe okulungileyo;

ababi babanjwa yizenzo zezandla zabo.

17Ababi babuyela engcwabeni,

zonke izizwe ezikhohlwa uNkulunkulu.

18Kodwa abaswelayo kabayikukhohlakala kokuphela,

njalo lethemba labahlukuluzwayo kaliyikutshabalala.

19Vuka Thixo, ungayekeli umuntu anqobe;

akuthi izizwe zahlulelwe phambi kwakho.

20Batshayise ngovalo, Oh Thixo;

akuthi izizwe zikwazi ukuthi zingabantu nje.