AmaHubo 80

Kumqondisi wokuhlabela. Itshuni ethi, “Amaluba esiVumelwano.” Elika-Asafi. Ihubo.

1Sizwe, Oh Malusi ka-Israyeli,

wena okhokhela uJosefa njengomhlambi wezimvu;

wena ohlezi esihlalweni sobukhosi

uphahlwe ngamakherubhi,

benyezela

2phambi kuka-Efrayimi loBhenjamini loManase.

Vusa amandla akho; woza usisindise.

3Sivuselele, Oh Nkulunkulu;

yenza ubuso bakho bukhanye phambi kwethu,

ukuze sisindiswe.

4Oh Thixo Nkulunkulu Somandla,

koze kube nini ulaka lwakho luvutha

phezu kwemikhuleko yabantu bakho?

5Usubafunzile ngesinkwa sezinyembezi;

ubenze banatha inyembezi ezigcwele umganu.

6Ususenze saba yimbangela yengxabano kubomakhelwane bethu,

lezitha zethu ziyasihleka.

7Sivuselele, Oh Nkulunkulu Somandla;

khanyisa ubuso bakho kithi,

ukuze sisindiswe.

8Waletha ivini ulisusa eGibhithe;

wazixotsha izizwe waligxumeka,

9walicentela indawo

labamba emhlabathini lagcwala ilizwe.

10Izintaba zagcwala umthunzi walo,

imisedari emikhulu yathi silikici ngamagatsha alo.

11Lakhulisa amagatsha alo anabela oLwandle,

amahlumela alo afika kude eMfuleni.

12Kungani na usudilize imiduli yalo

ukuze bonke abedlulayo baziqhululele izithelo zalo?

13Ingulungunda ziyalivadlaza,

lezidalwa zeganga zizitika ngalo.

14Buya kithi, Oh Nkulunkulu Somandla!

Khangela phansi usezulwini ubone!

Nakekela ivini leli,

15impande ehlanyelwe yisandla sakho sokunene,

indodana ozondlele yona wena.

16Ivini lakho seliqunyiwe, selitshiswe ngomlilo;

ngokukhuza kwakho abantu bayabhubha.

17Yeyamisa isandla sakho emuntwini ongakwesokunene kwakho,

indodana yomuntu ozondlele yona.

18Yikho asiyikukufulathela, sivuselele,

ukuze sibize ibizo lakho.

19Sivuselele, Oh Thixo Nkulunkulu Somandla;

khanyisa ubuso bakho kithi,

ukuze sisindiswe.