AmaHubo 58

Kumqondisi wokuhlabela. Itshuni ethi, “Ungabhidlizi.” ElikaDavida. Imikithamu.

1Lina babusi, kambe likhuluma okuqondileyo na?

Lahlulela ngobuqotho yini ebantwini?

2Hatshi, ezinhliziyweni zenu lakha amacebo okubusa kubi,

lezandla zenu zijezisa ngochuku emhlabeni.

3Kwasekuzalweni ababi bayaphumputheka;

kwasekuzalweni baxhwalile, beqamba amanga.

4Itshefu yabo ifana letshefu yenyoka,

ifana leyebululu elingezwa umsindo,

5elingananzi lomculo wombumbi,

loba lowombumbi eligabazi elinganani.

6Khumula amazinyo emilonyeni yazo, awu Nkulunkulu;

zikhumule, Oh Thixo, izingavula zezilwane!

7Yekela zinyamalale njengamanzi agelezayo;

zithi lapho zinweba idandili,

kayithundubale imitshoko yazo.

8Njengomnenke uncibilika uphele ulokhu uhamba,

njengomphunzo, kabangaliboni ilanga.

9Imbiza zakho zingakaqalisi ukutshisa

ngomlilo wenkuni zameva

loba ngezimanzi kumbe ngezomileyo

ababi bazakhukhulelwa khatshana.

10Abalungileyo bazajabula nxa sebephindiselelwa,

nxa sebegeza inyawo zabo egazini lababi.

11Lapho-ke abantu bazakuthi,

“Ngempela abalungileyo bajinge bathole umvuzo;

ngempela ukhona uNkulunkulu owahlulela umhlaba.”