Biblica® IBhayibhili Elingcwele LesiNdebele Elifinyelelekayo
AmaHubo 56
Kumqondisi wokuhlabela. Kulandelwa itshuni ethi, “Ijuba phezu kwemikusu ekude.” ElikaDavida. Imikithamu. Lapho wayesethunjwe ngamafilistiya eGathi.
Woba lomusa kimi, Oh Nkulunkulu,
ngoba abantu baxotshana lami kubi;
ilanga lonke bayajujumezela bengihlasela.
Labo abangigconayo baxotshana lami ilanga lonke;
abanengi bangihlasela bekloloda.
Nxa ngisesaba ngizathemba kuwe.
KuNkulunkulu, engidumisa ibizo lakhe,
ngithemba kuye uNkulunkulu; angiyikwesaba.
Umuntu wenyama angenzani kimi?
Ilanga lonke batshona behlanekela amazwi ami;
beqoqa ukungibhidliza.
Bayabuthana bengicathamela
balandele izinyathelo zami
betshisekela ukucitsha impilo yami.
Loba sekutheni ungabayekeli baphunyuke;
ngokuthukuthela kwakho, Nkulunkulu, zidilize izizwe.
Bhala phansi isililo sami;
bhala ithonsi ngalinye lezinyembezi zami emqulwini wakho
kazikho yini emibhalweni yakho?
Lapho-ke izitha zami zizafulathela
nxa sengicela uncedo.
Ngalokhu ngizakwazi ukuthi uNkulunkulu ulami.
KuNkulunkulu, engidumisa ibizo lakhe,
kuThixo engidumisa ibizo lakhe,
kuNkulunkulu ngiyathemba; angiyikwesaba.
Umuntu angenzani kimi na?
Ngibanjwe yizifungo kuwe, Oh Nkulunkulu;
ngizakwethula umnikelo wami wokubonga kuwe.
Ngoba ungikhulule ekufeni
lezinyawo zami lapho ngikhubeka,
ukuze ngihambe phambi kukaNkulunkulu
ekukhanyeni kwempilo.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.