AmaHubo 19

Kumqondisi wokuhlabela. Ihubo likaDavida.

1Amazulu afakaza inkazimulo kaNkulunkulu;

lomkhathi utshumayela umsebenzi wezandla zakhe.

2Usuku ngosuku lezizinto ziyakhuluma;

ubusuku lobusuku zibonisa ulwazi.

3Akula nkulumo, akula mazwi

ilizwi lazo alizwakali.

4Kodwa Ilizwi lazo lizwakala emhlabeni wonke,

amazwi azo afika emikhawulweni yomhlaba.

Emazulwini uNkulunkulu uselakhele ithente ilanga.

5Lona linjengomyeni ephuma exhibeni lakhe,

njengentshantshu ethakazelela ukugijima ibanga layo.

6Liphuma emkhawulweni wamazulu

lihambe indlela yalo liyotshona ngakuloyana;

kakukho okusithekileyo ekutshiseni kwalo.

7Umthetho kaThixo uphelele

uvuselela umphefumulo.

Izimiso zikaThixo zithembekile,

zihlakaniphisa izithutha.

8Iziqondiso zikaThixo zilungile,

ziletha ukuthokoza enhliziyweni.

Imilayo kaThixo isobala,

iletha ukukhanya emehlweni.

9Ukumesaba uThixo kuhlanzekile,

kumi kuze kube phakade.

Izahlulelo zikaThixo ziqinisekile

njalo zilungile ngokupheleleyo.

10Ziligugu okudlula igolide,

okudlula igolide elinengi elicengekileyo;

zimnandi kuloluju,

uluju olujuluka ohlangeni.

11Ngazo inceku yakho iyacetshiswa;

ukuzilandela kulomvuzo omkhulu.

12Ngubani ongazizwisisa iziphambeko zakhe?

Thethelela iziphambeko zami ezisithekileyo.

13Phephisa inceku yakho ezonweni zamabomo;

sengathi zingeze zabusa phezu kwami.

Lapho ngizakuba msulwa

ngingabi lacala lokona okukhulu.

14Sengathi amazwi omlomo wami leminakano yenhliziyo yami

kungathokozisa emehlweni akho,

Oh Thixo, Dwala lami loMhlengi wami.