Biblica® IBhayibhili Elingcwele LesiNdebele Elifinyelelekayo
AmaHubo 141
Ihubo likaDavida
Oh Thixo, ngiyakubiza; woza masinyane kimi.
Zwana ilizwi lami nxa ngikubiza.
Sengathi umkhuleko wami ungema phambi kwakho njengempepha;
kuthi ukuphakama kwezandla zami kube njengomhlatshelo wakusihlwa.
Ngibekela umlindi womlomo wami, Oh Thixo,
qaphela umnyango wezindebe zami.
Ungayekeli inhliziyo yami ihugwe ngokubi,
ngingene ezenzweni ezimbi
labantu abayizigangi;
mangingadli izibiliboco zabo.
Ake ngitshaywe ngumuntu olungileyo, kungumusa;
kake angikhuze, kungamafutha ekhanda lami.
Ikhanda lami kaliyikukwala.
Ikanti umkhuleko wami uhlezi umelana lezenzo zezigangi.
Ababusi bazo bazaphoselwa phansi emaweni,
lababi bazafunda ukuthi amazwi ami ayekhulunywe kuhle.
Bazakuthi, “Njengalowo olimayo eqeqebula umhlabathi,
kanjalo amathambo ethu achithiziwe emlonyeni weliba.”
Kodwa amehlo ami agxile kuwe, Oh Thixo woBukhosi;
kuwe ngiyaphephela unganginikeli ekufeni.
Ngivikela emijibileni asebeyithiyele mina,
ezifini ezithiywe yizigangi.
Akuthi ababi bawele emambuleni abo,
mina ngidlule kuhle ngiphephile.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.