Biblica® IBhayibhili Elingcwele LesiNdebele Elifinyelelekayo
AmaHubo 118
Mbongeni uThixo ngoba ulungile;
uthando lwakhe lumi laphakade.
U-Israyeli katsho athi:
“Uthando lwakhe lumi laphakade.”
Kayithi indlu ka-Aroni:
“Uthando lwakhe lumi laphakade.”
Akuthi bonke abamesabayo uThixo bathi:
“Uthando lwakhe lumi laphakade.”
Ngathi ngidabukile ngakhala kuThixo,
waphendula ngokungikhulula.
UThixo ulami, angiyikwesaba.
Umuntu angenzani kimi na?
UThixo ulami; ungumsizi wami.
Ngizazinyonkoloza ngegunya izitha zami.
Kungcono ukuphephela kuThixo
kulokuthemba umuntu.
Kungcono ukuphephela kuThixo
kulokuthemba amakhosana.
Zonke izizwe zangihanqa,
kodwa ngegama likaThixo ngazichitha.
Zangihanqa inxa zonke
kodwa ngegama likaThixo ngazichitha.
Zangiminyezela njengezinyosi
kodwa zafa masinyane njengokungunguma komlilo wameva;
ngebizo likaThixo ngazichitha.
Ngasunduzelwa emuva ngaphose ngawa,
kodwa uThixo wangisiza.
UThixo ungamandla ami lengoma yami;
yena useyikusindiswa kwami.
Imisindo yentokozo lokunqoba
iphuma emathenteni abalungileyo:
“Isandla sokunene sikaThixo senzile izinto ezinkulu!
Isandla sokunene sikaThixo siphakanyisiwe kakhulu;
isandla sokunene sikaThixo senzile izinto ezinkulu!”
Angizukufa kodwa ngizaphila,
ngizamemezela lokho akwenzileyo uThixo.
UThixo ungitshayile kakhulu,
kodwa kanginikelanga ekufeni.
Ngivulela amasango okulunga;
ngizangena ngimbonge uThixo.
Nanti isango likaThixo
okungangena khona abalungileyo.
Ngizakubonga, ngoba ungiphendulile;
usuyinsindiso yami.
Ilitshe ababelilahlile
seliyilona ilitshe lekhoneni;
uThixo ukwenzile lokhu;
njalo kuyamangalisa emehlweni ethu.
Leli lilanga alenzileyo uThixo;
kasithokoze sijabule ngalo.
Oh Thixo, sisindise;
Oh Thixo, siphumelelise.
Ubusisiwe lowo obuya ngebizo likaThixo.
Siyakubusisa sisendlini kaThixo.
UThixo unguNkulunkulu,
wenzile ukukhanya kwakhe kwehlela phezu kwethu.
Liphethe izingatshana, ngenani edibini lomgido
lize liyefika empondweni ze-alithare.
UnguNkulunkulu wami, ngizakubonga;
unguNkulunkulu wami, ngizakuphakamisa.
Mbongeni uThixo ngoba ulungile;
uthando lwakhe lumi kuze kube phakade.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.