Biblica® IBhayibhili Elingcwele LesiNdebele Elifinyelelekayo
UJoshuwa 12
Uluhlu Lwamakhosi Ehlulwayo
La ngamakhosi amazwe anqotshwa ngabako-Israyeli njalo alezabelo ezathunjwa empumalanga yeJodani, kusukela eDongeni lwase-Arinoni kusiya entabeni yaseHemoni, okugoqela lonke icele langempumalanga ye-Arabha:
USihoni inkosi yama-Amori, wayebusa eHeshibhoni.
Wayebusa kusukela e-Aroweri emaphethelweni oDonga lwase-Arinoni, kusukela phakathi laphakathi kodonga kusiyafika emfuleni uJabhoki, oyiwo umngcele wama-Amoni. Lokhu kwakugoqela ingxenye yeGiliyadi.
Wayebusa njalo empumalanga ye-Arabha kusukela olwandle lweKhinerethi kusiyafika olwandle lwe-Arabha (uLwandle lweTswayi) kusiya eBhethi-Jeshimothi, eningizimu phansanyana kwemithezuko yasePhisiga:
Lelizwe lika-Ogi inkosi yaseBhashani, omunye wamaRefayi okucina owayebusa e-Ashitharothi le-Edreyi.
Wabusa eNtabeni yaseHemoni, eSalekha, iBhashani yonke kusiya emngceleni wabantu beGeshuri leMahakhathi, lengxenye yeGiliyadi kusiya emngceleni kaSihoni inkosi yeHeshibhoni.
UMosi inceku kaThixo, labako-Israyeli babanqoba. UMosi inceku kaThixo wanika ilizwe labo abakoRubheni labakoGadi lengxenye yesizwana sakoManase ukuthi libe ngelabo.
La yiwo amakhosi elizwe lelo uJoshuwa labako-Israyeli abalithumbayo eceleni elisentshonalanga yeJodani, kusukela eBhali-Gadi esiGodini seLebhanoni kusiya eNtabeni yeHalakhi ekhangele eSeyiri (amazwe abo uJoshuwa wawanika njengelifa ezizwaneni zako-Israyeli kusiya ngezigaba zezizwana zabo, indawo elamaqaqa, amawatha asentshonalanga, i-Arabha, lemithezukweni yezintaba, inkangala leNegebi, amazwe amaHithi, ama-Amori, amaKhenani, amaPherizi, amaHivi, lamaJebusi):
La ayengamakhosi:
inkosi yeJerikho, eyodwa
inkosi ye-Ayi (eduze leBhetheli), eyodwa
inkosi yeJerusalema, eyodwa
inkosi yeHebhroni, eyodwa
inkosi yeJamuthi, eyodwa
inkosi yeLakhishi, eyodwa
inkosi ye-Egiloni, eyodwa
inkosi yeGezeri, eyodwa
inkosi yeDebhiri, eyodwa
inkosi yeBhethi-Gaderi, eyodwa
inkosi yeHoma, eyodwa
inkosi ye-Aradi, eyodwa
inkosi yeLibhina, eyodwa
inkosi ye-Adulami, eyodwa
inkosi yeMakheda, eyodwa
inkosi yeBhetheli, eyodwa
inkosi yeThaphuwa, eyodwa
inkosi yeHeferi, eyodwa
inkosi ye-Afekhi, eyodwa
inkosi yeLasharoni, eyodwa
inkosi yeMadoni, eyodwa
inkosi yeHazori, eyodwa
inkosi yeShimron Meroni, eyodwa
inkosi ye-Akhishafi, eyodwa
inkosi yeThanakhi, eyodwa
inkosi yeMegido, eyodwa
inkosi yeKhedeshi, eyodwa
inkosi yeJokhiniyamu eseKhameli, eyodwa
inkosi yeDori (eNafothi Dori), eyodwa
inkosi yeGoyimi eseGiligali, eyodwa
inkosi yeThiza, eyodwa.
Amakhosi angamatshumi amathathu lanye esewonke.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.