U-Isaya 38

Ukugula KukaHezekhiya

1Ngalezonsuku uHezekhiya wagula eselengela ekufeni. Umphrofethi u-Isaya, indodana ka-Amozi waya kuye wathi, “Nanku okutshiwo nguThixo: Lungisa indlu yakho ngoba uzakufa, awuyikusila.”

2UHezekhiya waphenduka wakhangela emdulini wakhuleka kuThixo esithi, 3“Khumbula, Thixo, ukuthi ngihambe phambi kwakho ngokuthembeka langokuzinikela ngenhliziyo yami yonke, njalo ngenze okuhle emehlweni akho.” UHezekhiya wakhala kabuhlungu.

4Emva kwalokho kwafika ilizwi likaThixo ku-Isaya lisithi: 5“Yana kuHezekhiya uthi kuye, ‘Nanku okutshiwo nguThixo, uNkulunkulu kayihlo uDavida, uthi: Ngiwuzwile umkhuleko wakho, njalo ngizibonile lezinyembezi zakho. Ngizakwengezelela iminyaka elitshumi lanhlanu ekuphileni kwakho. 6Njalo ngizakukhulula wena, kanye ledolobho leli ezandleni zenkosi yase-Asiriya. Ngizavikela idolobho leli.

7Lesi yisibonakaliso sikaThixo kuwe sokuthi uThixo uzakwenza njengokuthembisa kwakhe: 8Ngizakwenza umthunzi obangelwe lilanga ubuyele emuva amanyathelo alitshumi umthunzi owehle ngawo emakhwelelweni ka-Ahazi.’ ” Ngakho ukukhanya kwelanga kwabuyela emuva ngamanyathela alitshumi elaselikhothame ngawo.

9La ngamazwi alotshwa nguHezekhiya inkosi yakoJuda emva kokuba esesilile ekuguleni kwakhe:

10Ngathi, “Ebuhleni bokuphila kwami

kumele ngedlule emasangweni okufa

ngamukwe iminyaka yami eseleyo na?”

11Ngathi, “Angiyikumbona futhi uThixo ngokwakhe

elizweni labaphilayo;

angisayikubabona futhi abantu bakithi

loba ngibe lalabo abahlala kulumhlaba.

12Njengethente lomelusi indlu yami

idiliziwe ngayithathelwa.

Njengomaluki impilo yami ngiyigoqile,

ungisusile osungulweni;

emini lebusuku ungenze ngaphela.

13Ngalinda ngokubekezela kwaze kwasa,

kodwa amathambo ami uwephule wonke njengesilwane;

emini lebusuku ungenze ngaphela.

14Ngakhala njengenkonjane kumbe ihemu,

ngabubula njengejuba elililayo.

Amehlo ami afiphele ngokukhangela phezulu.

Awu Thixo, ngikhathazekile, woza ungisize!”

15Kodwa ngingathini na?

Ukhulumile kimi, wena ngokwakho ukwenzile lokhu.

Ngizahamba ngokuzithoba ekuphileni kwami konke

ngenxa yobuhlungu bomoya wami.

16Thixo, abantu baphila ngezinto ezinje;

lomoya wami uthola ukuphila kuzo.

Wangibuyisela empilweni

wangenza ngaphila.

17Ngeqiniso kwaba lusizo kimi

ukuzwa ubuhlungu obungaka.

Ngothando lwakho wangivikela

emgodini wokutshabalaliswa;

izono zami zonke

uzibeke ngemva kwakho.

18Ngoba ingcwaba alingeke likubonge

lokufa akungeke kukudumise;

labo abangena emgodini

abangeke bathemba ubuqotho bakho.

19Abaphilayo, ngempela abaphilayo, bayakudumisa

njengalokhu engikwenzayo lamuhla;

abazali batshela abantwababo

ngobuqotho bakho.

20UThixo uzangisindisa;

njalo sizahlabelela ngamachacho

kuzozonke insuku zokuphila kwethu

ethempelini likaThixo.

21U-Isaya wayethe, “Lungisani isigaqa semikhiwa usifake phezu kwethumba, uzasila.”

22UHezekhiya wayebuze wathi, “Kuyini okuzakuba yisibonakaliso sokuthi ngizakhwela ngiye phezulu ethempelini likaThixo na?”