Biblica® IBhayibhili Elingcwele LesiNdebele Elifinyelelekayo
UGenesisi 11
Umphongolo WaseBhabheli
Umhlaba wonke wawulolimi lunye lokukhuluma okufananayo. Kwathi abantu belokhu beqhelela empumalanga, bafumana indawo evulekileyo eShinari basebesakha khona.
Basebetshelana bathi, “Kasitshayeni izitina sizitshise kakhulu.” Babesebenzisa izitina endaweni yamatshe, lethara endaweni yodaka. Basebesithi, “Zwanini, kasizakheleni idolobho libe lomphongolo ofika emazulwini, ukuze sizenzele ibizo singaze sasabalala umhlaba wonke.”
Kodwa uThixo wehla wazalibona idolobho kanye lomphongolo abantu ababewakha. UThixo wathi, “Nxa bengabantu banye bekhuluma limi lunye sebeqalisile ukwenza lokhu, pho kakukho okungabehlula. Zwanini, kasehleni siye phansi sisanganise ulimi lwabo bangabe besazwana.”
Kanjalo uThixo wabahlakaza emhlabeni wonke, bayekela ukwakha idolobho. Kungakho labizwa ngokuthi yiBhabheli, ngoba khonapho uThixo wasanganisa ulimi lomhlaba wonke. Kusukela lapho uThixo wabahlakazela emhlabeni wonke.
Kusukela KuShemu Kusiya Ku-Abhrama
Lo ngumlando wosendo lukaShemu.
Eminyakeni emibili emva kukazamcolo, uShemu eseleminyaka elikhulu (100) wazala u-Afazadi. Esezele u-Afazadi, uShemu waphila okweminyaka engamakhulu amahlanu (500), njalo waba lamanye amadodana lamadodakazi.
Kwathi u-Afazadi esephile iminyaka engamatshumi amathathu lanhlanu (35), wazala uShela. Esezele uShela, u-Afazadi waphila okweminyaka engamakhulu amane lantathu (403), njalo waba lamanye amadodana lamadodakazi.
UShela esephile iminyaka engamatshumi amathathu (30) wazala u-Ebha. Esezele u-Ebha, uShela waphila okweminyaka engamakhulu amane lantathu (403), njalo waba lamanye amadodana lamadodakazi.
U-Ebha esephile iminyaka engamatshumi amathathu lane (34) wazala uPhelegi. Esezele uPhelegi, u-Ebha waphila okweminyaka engamakhulu amane lamatshumi amathathu (430), njalo waba lamanye amadodana lamadodakazi.
UPhelegi esephile iminyaka engamatshumi amathathu (30), wazala uRewu. Esezele uRewu, uPhelegi waphila okweminyaka engamakhulu amabili lesificamunwemunye (209), njalo waba lamanye amadodana lamadodakazi.
Kwathi uRewu esephile iminyaka engamatshumi amathathu lambili (32), wazala uSerugi. Esezele uSerugi, uRewu waphila okweminyaka engamakhulu amabili lesikhombisa (207), njalo waba lamanye amadodana lamadodakazi.
Kwathi uSerugi esephile iminyaka engamatshumi amathathu (30), wazala uNahori. Esezele uNahori, uSerugi waphila okweminyaka engamakhulu amabili (200), njalo waba lamanye amadodana lamadodakazi.
UNahori esephile iminyaka engamatshumi amabili lesificamunwemunye (29) wazala uThera. Esezele uThera, uNahori waphila okweminyaka elikhulu letshumi lesificamunwemunye (119), njalo waba lamanye amadodana lamadodakazi.
UThera esephile iminyaka engamatshumi ayisikhombisa (70) wazala u-Abhrama, uNahori loHarani.
Imuli Ka-Abhrama
Lo ngumlando wosendo lukaThera.
UThera wazala u-Abhrama, uNahori loHarani. Kwathi uHarani wazala uLothi. Kwathi uyise uThera esaphila uHarani wafa bese-Uri idolobho lamaKhaladiya, elizweni lokuzalwa kwakhe. U-Abhrama loNahori bathatha bobabili. Ibizo lomka-Abhrama lalinguSarayi, kwathi ibizo likamkaNahori linguMilikha; wayeyindodakazi kaHarani uyise kaMilikha kanye lo-Isikha. Kodwa uSarayi wayeyinyumba; wayengelabantwana.
UThera wathatha indodana yakhe u-Abhrama, lomzukulu wakhe uLothi indodana kaHarani, lomalokazana wakhe uSarayi umfazi wendodana yakhe u-Abhrama, basuka bonke e-Uri lamaKhaladiya baqonda eKhenani. Kodwa bafika eHarani basebesakha khona.
UThera waphila okweminyaka engamakhulu amabili lanhlanu (205), wafela eHarani.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.