Biblica® IBhayibhili Elingcwele LesiNdebele Elifinyelelekayo
UMtshumayeli 8
Ngubani onjengomuntu ohlakaniphileyo na?
Ngubani oyaziyo ingcazelo yezinto na?
Ukuhlakanipha kuyabukhanyisa ubuso bomuntu
njalo kuguqula ukunyukubala kwabo.
Hlonipha Inkosi
Ngithi hlonipha umlayo wenkosi ngoba wenza isifungo phambi kukaNkulunkulu. Ungawalazeli ukusuka phambi kwenkosi. Ungalumeli ulutho nxa lungaqondanga ngoba yona ingenza loba yini eyithandayo. Njengoba ilizwi lenkosi lingaphikiswa ngubani ongathi kuyo, “Kanti wenzani?”
Lowo ohlonipha imilayo yayo akayikwehlelwa ngokubi,
lenhliziyo ehlakaniphileyo iyasazi isikhathi lendlela yokwenza.
Ngoba into yonke ilesikhathi esiqondileyo lendlela yokwenza eqondileyo,
lanxa umuntu eyabe esindwa yizinkathazo zakhe.
Njengoba kungekho muntu olaziyo ikusasa,
ngubani pho ongamtshela okuzayo na?
Njengoba kungelamuntu olamandla phezu komoyo ovunguzayo
Akulamuntu olamandla phezu kosuku lwakhe lokufa.
Njengoba ibutho lingakhululwa ngesikhathi sempi,
kunjalo ukuxhwala akuyikubakhulula labo abaphila ngakho.
Konke lokhu ngakubona lapho ngangihlolisisa ngengqondo yami konke okwenziwayo ngaphansi kwelanga. Kukhona isikhathi lapho umuntu aphatha khona abanye ngochuku kanti uyazilimaza yena. Ngabona njalo ababi bengcwatshwa, labo ababehlala befika bahambe endaweni engcwele bazuze udumo kulelodolobho ababeganga khona. Khona lakho kuyize.
Nxa isigwebo secala singenziwanga masinyane, abantu basuka bacabange ukuqhubeka ngokuganga kwabo. Loba umuntu ogangileyo engenza amacala alikhulu ajinge aphile okwesikhathi eside, ngiyazi ukuthi kuzakuba ngcono kulabo abamesabayo uNkulunkulu, abazithobayo kuNkulunkulu. Kodwa ngenxa yokuthi izixhwali kazimesabi uNkulunkulu, kakuzukuzilungela, lezinsuku zazo kaziyukweluleka njengesithunzi.
Kukhona njalo enye into eyize eyenzakalayo emhlabeni: abantu abalungileyo abazuza okufanele ababi, labantu ababi abazuza okufanele abalungileyo. Ngithi lokhu lakho kudida ingqondo. Ngakho-ke ngikhuthaza ukuzithokozisa empilweni ngoba kakukho okungcono emuntwini ngaphansi kwelanga kulokuzitika, unathe, uthokoze. Lapho-ke injabulo izahlala injalo kuye emsebenzini wakhe zonke insuku zokuphila kwakhe aziphiwe nguNkulunkulu lapha emhlabeni.
Ngathi ngibeka ingqondo yami ekwazini ukuhlakanipha lokunanzelela imisebenzi yabantu emhlabeni, umuntu engalali imini lobusuku, ngasengibona konke uNkulunkulu akwenzileyo. Kakho ongaqedisisa okwenzakalayo ngaphansi kwelanga. Loba umuntu ohlakaniphileyo angazitshaya owaziyo, kodwa angeke akuqedisise.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.