Biblica® IBhayibhili Elingcwele LesiNdebele Elifinyelelekayo
UMtshumayeli 4
Ukuhlupheka, Ukusebenza Nzima, Ukuswela Umngane
Ngakhangela njalo ngabona konke ukuncindezelwa okwakukhona ngaphansi kwelanga:
Ngabona inyembezi zabancindezelwayo
babengelabaduduzi;
amandla ayekulaba abancindezelayo
abalaye umduduzi.
Ngangifakaza ukuthi abafileyo,
abavele sebefile,
bayathokoza kulabaphilayo,
abalokhu besaphila.
Kodwa okungcono kulakho kokubili
ngulowo ongakabikhona,
ongakaboni ububi
obenziwayo ngaphansi kwelanga.
Ngasengibona ukuthi konke ukusebenza lokuphumelela konke kuvela emhawini womuntu ngomakhelwane wakhe. Lokhu lakho kuyize, kuyikuxotshana lomoya.
Isiwula sigoqa izandla zaso
sidilize impilo yaso.
Kungcono isandla esisodwa esigcweleyo silokuthula
kulezandla ezimbili ezingagcwalanga ezilomtshikatshika
lokuxotshana lomoya.
Njalo ngabona okunye okuyize ngaphansi kwelanga:
Kwakulendoda eyayiyodwa zwi;
yayingelandodana loba umfowabo.
Yayisebenza gadalala ingaphumuli,
kodwa amehlo ayo ayengasuthiswa yinotho yayo.
Yabuza yathi, “Ngiginqela bani kangaka,
njalo kungani ngizincitsha intokozo?”
Lokhu lakho kuyize
umsebenzi othelela usizi!
Ababili bangcono kuloyedwa,
ngoba balomvuzo obonakalayo ngomsebenzi wabo.
Omunye angawa,
umngane wakhe uyamncedisa amvuse.
Kodwa maye lowomuntu owayo
kungelamuntu ongamsiza amvuse!
Njalo nxa ababili belala ndawonye bazakhudumezana.
Kanti umuntu angakhudumala kanjani eyedwa na?
Loba umuntu engehlulwa nxa eyedwa,
ababili bangazivikela.
Intambo elemicu emithathu kayiqamuki lula.
Ukuphiwa Isikhundla Kuyize
Lingcono ijaha elingumyanga kodwa lihlakaniphile kulenkosi endala eyisiwula eyalayo ukwamukela izixwayiso. Ijaha lelo kungabe ngeliphuma ejele libe yinkosi, loba lingelazalelwa ebuyangeni elizweni lalowombuso. Ngabona ukuthi bonke ababephila behamba ngaphansi kwelanga balilandela lelojaha elathatha isikhundla sobukhosi. Amakhosi la (endala lencinyane) kungabe ayelodumo elandelwa ngabantu abanengi abangelakubalwa. Kodwa izizukulwane ezilandelayo azimthandanga lowo owathatha ubukhosi. Lokhu lakho kuyize, yikuxotshana lomoya.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.