Biblica® IBhayibhili Elingcwele LesiNdebele Elifinyelelekayo
U-Amosi 2
Nanku okutshiwo nguThixo:
“Ngenxa yezono ezintathu zaseMowabi
loba ngenxa yezine, kangiyikulunqanda ulaka lwami,
ngoba utshise amathambo enkosi yase-Edomi
aze afana lekalaga,
ngizathumela umlilo kuMowabi
ozalobisa izinqaba zaseKheriyothi.
UMowabi uzachitheka kulokuxokozela okukhulu
lokumenyezelwa kwezitsho zempi lokukhala kwecilongo.
Ngizaqothula ababusi bakhe
ngibulale zonke izikhulu zakhe kanye laye,”
kutsho uThixo.
Nanku okutshiwo nguThixo:
“Ngenxa yezono ezintathu zikaJuda
loba ngenxa yezine, kangiyikulunqanda ulaka lwami,
ngoba bawalile umthetho kaThixo
kabaze bagcina lezimiso zakhe,
ngoba badukiswe ngonkulunkulu bamanga,
onkulunkulu abalandelwa ngokhokho babo.
Ngizathumela umlilo koJuda
ozalobisa izinqaba zaseJerusalema.”
Ukwahlulelwa Kuka-Israyeli
Nanku okutshiwo nguThixo:
“Ngenxa yezono ezintathu zika-Israyeli
loba ngenxa yezine, kangiyikulunqanda ulaka lwami
ngoba bathengisa abalungileyo ngesiliva,
labaswelayo ngamanyathelo.
Banyathela phezu kwamakhanda abayanga
njengaphezu kothuli lomhlabathi
banqabele imfanelo yabancindezelweyo.
Uyise lendodana bembatha lentombi yinye
kanjalo bangcolise ibizo lami elingcwele.
Bacambalala phansi emaceleni ama-alithare wonke,
phezu kwezembatho ezithethwe ziyizibambiso.
Endlini kankulunkulu wabo
banatha iwayini elithethwe njengenhlawulo.
Ngachitha umʼAmori phambi kwabo,
lanxa wayemude njengemisedari
njalo eqine njengomʼokhi.
Ngachitha izithelo zakhe phezulu
kanye lempande zakhe ngaphansi.
Ngalikhupha eGibhithe
ngalikhokhela iminyaka engamatshumi amane enkangala
ukuba ngilinike ilizwe lama-Amori.
Ngakhupha labaphrofethi bephuma phakathi kwamadodana enu,
kanye lamaNaziri ephuma phakathi kwezinsizwa zenu.
Lokhu akuqotho na, bantu bako-Israyeli?”
kutsho uThixo.
“Kodwa lanathisa amaNaziri iwayini,
lalaya abaphrofethi ukuba bangaphrofethi.
Khathesi-ke mina ngizalichoboza
njengokuchoboza kwenqola ithwele amabele.
Olejubane kayikubaleka,
oqinileyo uzawaswela amandla akhe,
lebutho kaliyikusindisa impilo yalo.
Umtshoki akayikugxila,
ibutho elilejubane kaliyikuphunyuka
lomgadi webhiza kayikusindisa impilo yakhe.
Lebutho elilesibindi kakhulu,
ngalolosuku lizabaleka linqunu,”
kutsho uThixo.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.