Biblica® IBhayibhili Elingcwele LesiNdebele Elifinyelelekayo
1 AbaseThesalonika 5
Usuku LweNkosi
Bazalwane, mayelana lezikhathi lezinsuku akudingeki ukuba sililobele ngoba likwazi kahle ukuthi usuku lweNkosi luzafika njengesela ebusuku. Abantu besathi, “Ukuthula lokuvikeleka,” incithakalo izakwehlela phezu kwabo ngokujuma njengomhelo kowesifazane ozithweleyo njalo kabayikuphunyuka.
Kodwa lina bazalwane, kalikho emnyameni ukuba lolusuku lulijume njengesela. Lonke lingamadodana okukhanya lamadodana emini. Kasisibo bobusuku loba abobumnyama. Ngakho-ke, kasingafani labanye abaleleyo kodwa kasiphaphameni njalo sizithibe. Ngoba labo abalalayo balala ebusuku, lalabo abadakwayo badakwa ebusuku. Kodwa njengoba singabemini, kasizithibeni, sembathe ukukholwa lothando njengesihlangu sesifuba, lethemba lokusindiswa njengengowane. Ngoba uNkulunkulu kasimiselanga ulaka kodwa ukuba sithole ukusindiswa ngeNkosi yethu uJesu Khristu. Wasifela ukuze loba sikhangele kumbe silele, siphile laye. Ngakho-ke, qinisanani njalo lakhane njengoba likwenza.
Iziqondiso Zokucina
Siyalicela bazalwane, ukuba libahloniphe labo abasebenza nzima phakathi kwenu, abalikhathalelayo eNkosini njalo beliqondisa futhi. Bahlonipheni kakhulu ngothando ngenxa yomsebenzi wabo. Hlalisanani ngokuthula. Njalo siyalincenga bazalwane, baxwayiseni labo abangamavila, likhuthaze abadele inhliziyo, lisize ababuthakathaka njalo libekezelele umuntu wonke. Qaphelani kungabikhona ophindisela okubi ngokubi kodwa lihlale lizama ukwenzelana okuhle kanye lakwabanye abantu.
Thokozani kokuphela, likhuleke kokuphela njalo libonge konke okulehlelayo ngoba lokhu kuyintando kaNkulunkulu ngani kuKhristu uJesu.
Lingawucitshi umlilo kaMoya; lingazeyisi iziphrofethi kodwa zihloleni zonke; libambelele kokulungileyo, lixwaye konke okubi.
Sengathi uNkulunkulu uqobo, uNkulunkulu wokuthula angalenza libengcwele ngokupheleleyo. Sengathi umoya wenu wonke lomphefumulo kanye lomzimba kungalondolozwa kungelasici ekufikeni kweNkosi yethu uJesu Khristu. Lowo olibizayo uthembekile njalo uzakukwenza lokho.
Lisikhulekele bazalwane.
Bingelelani abazalwane bonke ngokwangana okungcwele.
Ngiyalilaya phambi kweNkosi ukuba incwadi le ibalelwe abazalwane bonke.
Umusa weNkosi yethu uJesu Khristu kawube lani.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.