2 Yohani

BALUWA YA PILI YA

YOHANI

ULONGULELU

Baluwa ya 2 ya Yohani yiyandikiwa na ndundami Yohani yaveli kucha mwaka wa milongu tisa pawonikili Yesu.

Yohani mweni ayimanyishili ha kucha yayandikili baluwa ayi badili yaki ayikemili mweni mvaha yalongosha lipinga lya yivamjumilili Kilistu. Fivelili mubaluwa ya 2 ya Yohani fiyifwana nakaka na fila fivelili muchilongu cha nyanyi chiyandikiwili na Yohani. Ayi yaveli yikuwoneka lipala pakuvilishili lilawu lya Yesu lya kwitama na ndambu wavika pamu utami wa Yesu na ngombikeshu ya Malawu vaki Yohani sula ya 15:9-10, Yohani wa pili sula ya 1:5-6. Yimanyika kucha Yohani ayu ndi yayandikili Chilongu cha Nyanyi cha Yohani na baluwa ndatu Yohani 1 na Yohani 2 na Yohani 3 paaveli akwikala Ifesu.

Yohani ayandikili baluwa ayi kwa mdala yashawuliwili na vana vaki kucha nakaka mweni aveli akuvayandikila vandu yivamjumilili Kilistu. Pambeli awombili baluwa ayi yaveli kwa vandu vosi. Chayilatili Yohani kuyandika baluwa ayi yaveli kuvakola mawoku lipinga lya vandu yivamjumilili Kilistu na kuvakayika veni vayilyepi na vawula va udesi.

Fivelili amu kwa chikata,

Yohani akukanda baluwa ayi kwa kuwomba akumuyandikila ghani na kuvajambusha yavavayeghela Yohani sula ya 1:1-3.

Kandi avakolili mawoku lipinga lya yivamjumilili na kuvakumbushila lila lilawu likomi Yohani wa pili sula ya 1:4-6.

Pambeli avakayikili veni kwilata vawula va udesi Yohani wa pili sula ya 1:7-11.

Yohani amalishili baluwa yaki kwa kuvaluvila kwikala nyanyi. Yohani wa pili sula ya 1:12-13.